Týrızmniń turaqty damýyn qoldaýǵa baǵyttalǵan 41 elden 251 músheni biriktiretin Dúnıejúzilik týrıstik alıansqa (World Tourism Alliance, WTA – úkimettik emes uıym) 2025 jyly Almaty tolyqqandy múshe boldy, dep jazady Egemen.kz.
WTA – memlekettik qurylymdar men bıznes ókilderin jáne sarapshylar qaýymdastyǵyn biriktiredi, halyqaralyq týrızmdi damytýǵa yqpal etedi, zertteýler júrgizedi, keńes beredi, maman daıarlaý isimen aınalysady. Sondaı-aq memlekettik jáne jeke sektor arasyndaǵy kooperasııany nyǵaıtady.
Almaty qalasy ákimdiginiń málimetinshe, qazirgi ýaqytta Hanchjoýda (QHR) WTA Sıanhý – 2025 is-sharasy ótip jatyr. Is-shara sheńberinde Almatyǵa Alıans quramyna qabyldanǵanyn rastaıtyn sertıfıkat resmı túrde tabystaldy.
WTA quramyna qabyldaný Almatynyń halyqaralyq seriktestigin kúsheıtip, jahandyq saraptamalyq ortaǵa jol ashady jáne qalanyń týrıstik áleýetin ilgeriletýge jańa múmkindikter týǵyzady.