Dáýirlerdi toǵystyrǵan dıalog

Is-shara kórnekti aqyn, túr­kolog, Qazaqstannyń Eńbek Eri, «IýNESKO qamqorlyǵyndaǵy Mádenıetterdi jaqyndastyrý ortalyǵy» memlekettik mýzeıi­niń dırektory Oljas Súleı­menovtiń shyǵarmashylyq mura­sy­na arnaldy. Bıyl onyń áıgili «AZ ı Iа» kitabynyń jaryq kórgenine 50 jyl tolyp otyr. Bul eńbek órkenıet bastaýlary men mádenıetter arasyndaǵy dıalogti gýmanıstik turǵydan túsindi­retin rámizdik týyndy retinde baǵa­lanady.

Dóńgelek ústel barysynda qatysý­shylarǵa aqynnyń arnaıy beıne qut­tyqtaýy usynyldy. Sondaı-aq Oljas Súleımenovtiń ómiri men shy­ǵarmashylyǵyna arnalǵan derekti fılm kór­setilip, onyń gýmanıstik mıssııasy Shyǵys pen Batysty sóz óneri, til jáne mádenıet arqyly baılanystyrýshy rýhanı kópir retindegi róli aıqyndaldy.

Is-sharaǵa Qazaqstannyń Túrkııa Respýblıkasyndaǵy elshiligi, TÚRKSOI ókilderi, IýNESKO qamqorlyǵyndaǵy Mádenıetterdi jaqyn­dastyrý ortalyǵy memlekettik mýzeıi dırektorynyń jalpy jáne uıymdastyrý máseleleri jónin­de­gi orynbasary Saltanat Áshimova, «Máde­nıetterdiń ózara árekettesý ortalyǵy» qoǵam­­dyq birlestiginiń dırektory Úmithan Muńalbaeva, Joǵary mamandyqtar ýnıversıtetiniń rektory, professor, ǵylym doktory Qadırhan Sýngýroǵlý, Ankara ýnıversıtetiniń «TÖMER» ortalyǵynyń dırektory Tımýr Gúltekin, Qazaqstan halqy Assam­bleıasy respýb­lı­ka­lyq Analar keńesiniń tóraǵa­sy, Prezıdent janyndaǵy áıel­der isteri jáne otbasylyq-demo­gra­fııa­lyq saıasat jónindegi ulttyq komıssııanyń múshesi Nazıpa Ydyrysqyzy, respýb­lıkalyq Dostyq úıiniń basshysy Nursáýle Áltekova, Qazaqstannyń eńbek sińirgen qaıratkeri, belgili jýrnalıst Erjan Ýaıys, basqa da zııaly qaýym ókilderi qatysty.

«IýNESKO qamqorlyǵyndaǵy Mádenıetterdi jaqyndastyrý ortalyǵy» memlekettik mýzeıi dırektorynyń orynbasary Saltanat Áshimova bul jıyn Oljas Súleımenovtiń áıgili «AZ ı Iа» kitabynyń jaryq kórgenine 50 jyl tolýyna uıym­dastyrylǵanyn, aqynnyń keler jyly atap ótiletin 90 jyldyq mereıtoıynyń bastamasy ekenin atap ótti. Ol qatysý­shylarǵa kitaptyń alǵash­qy túp­nusqasyn kórsetip, jarty ǵasyrdan keıin qaıta basylǵan nusqasyn jáne aqynnyń bıyl jaryq kórgen «Iа znaıý» atty eńbegin tanystyrdy.

«Bul shara – tek dóńgelek ústel nemese kórme ǵana emes. Bul – dáýirlerdi toǵystyrǵan dıalog, halyqtardy uıys­tyratyn tildiń qýaty, adamzattyq oıdyń keńdigi. Oljas Súleımenovtiń shyǵarmashylyǵy árdaıym bizdi bıikke, izgilikke, rýhanı tereńdikke jeteleıdi», – dedi Saltanat Áshimova.

Kórme aıasynda jazýshynyń ádebı muralary kópshilik nazaryna usynyldy. Ekspozısııada sırek basylymdar men arhıvtik materıaldar qoıylyp, onyń shyǵarmashylyq joly – «Arǵy­maqtar» men «AZ ı Iа»-ǵa deıin jan-jaqty kórsetildi.

Is-shara aıasynda TÚRKSOI uıy­myndaǵy Qazaqstannyń ókili Nyshangúl Qarataeva «Abaı» mereıtoılyq medali­men marapattaldy. Buǵan qosa, «IýNESKO qamqorlyǵyndaǵy Mádenıet­terdi jaqyndastyrý ortalyǵy» memlekettik mýzeıiniń qyzmetkerleri TÚRKSOI tarapynan mádenıetaralyq dıalogti damy­týǵa qosqan úlesteri úshin qurmet gramotalarymen marapattaldy.