Qyrǵyz Respýblıkasy Mınıstrler kabıneti tóraǵasynyń orynbasary Edıl Baısalov pen QR Ǵylym jáne joǵary bilim vıse-mınıstri Talǵat Eshenkýlov bastaǵan Qyrǵyz Respýblıkasynyń delegasııasy Sátbaev ýnıversıtetine kelip, joǵary oqý oryndary bazasynda ashylǵan sheteldik fılıaldardyń jumysy, ınfraqurylymy, ǵylymy jáne Qazaqstannyń alǵashqy tehnıkalyq ýnıversıtetiniń ǵylymı jobalarymen tanysty, dep jazady Egemen.kz.
Qonaqtar ýnıversıtettiń negizgi ǵylymı jáne bilim berý bólimshelerin aralap, Stroytech tehnologııalyq parki, Halyqaralyq ozyq fýnksıonaldyq materıaldar jáne olardyń kompozıtteri jónindegi R&D ortalyǵy, Porsche jáne Astana Motors aýdıtorııalarynda boldy. Ásirese City University of Hong Kong fılıaly men MIT FabLab óndiristik zerthanasyna basa nazar aýdaryldy – bul álemniń jetekshi ýnıversıtetteriniń biregeı erekshe fılıaldary bolyp tabylady jáne Sátbaev ýnıversıtetiniń stýdentterine álemdik standarttar boıynsha bilim alýǵa, ozyq tehnologııalarmen jumys isteýge jáne jahandyq zertteý jobalaryna qatysýǵa múmkindik beredi.
Sapar barysynda delegasııa zamanaýı oqytý ádisterimen, ǵylymnyń oqý prosesine ıntegrasııalanýymen jáne startaptardy damytýǵa múmkindik beretin ýnıversıtet ekojúıesimen tanysty. Qyrǵyz Respýblıkasynyń ókilderi zerthanalar men oqý aýdıtorııalarynyń joǵary tehnıkalyq jabdyqtalýyn, stýdentterdiń zamanaýı tehnologııalardy naqty jaǵdaıda meńgerýine múmkindik beretin tájirıbege baǵdarlanǵan oqytý tásilin, sondaı-aq Sátbaev ýnıversıtetiniń ınjener kadrlardy daıarlaýda halyqaralyq ortalyq retindegi áleýetin erekshe atap ótti.
Bul sapar IýNISEF uıymdastyrǵan «2050 urpaǵy: erteńgi kúnge búgingi ınvestısııalar» atty konferensııasyna Qyrǵyz delegasııasynyń qatysýy aıasynda ótti jáne Qazaqstan men Qyrǵyzstan elderi arasynda ǵylym, bilim jáne ınnovasııalar salalary boıynsha yntymaqtastyqty nyǵaıtýda mańyzdy qadam boldy.