Tallın qalasynda ótken «Qara túnder» (Tallinn Black Nights Film Festival, PÖFF) halyqaralyq kınofestıvaliniń jabylý saltanatynda otandyq «Pobedıteleı vıdno na starte» (Becoming) fılmi bedeldi marapatqa ıe boldy. Fılmniń rejısseri ári prodıýseri Jannat Alshanova «Koprodýksııa» sanatynda «Eń úzdik Baltyq óńiri prodıýseri» júldesin ıelendi.
Aıta keteıik, rejısserdiń tolyqmetrajdy debıýttik jumysy – «Accidental Films» JShS túsirgen kartına. Fılm Mádenıet jáne aqparat mınıstrligi men Ulttyq kınony qoldaý memlekettik ortalyǵynyń qoldaýymen dúnıege kelgen. Joba halyqaralyq yntymaqtastyq aıasynda Fransııanyń (Films de Force Majeure), Nıderlandtyń (Volya Films), Lıtvanyń (M-Films), Shvesııanyń (Kjellson & Wik) prodıýserlik kompanııalarymen jáne Saýd Arabııasy Koroldiginiń qoldaýymen túsirilgen.
Týyndyda 17 jastaǵy Mıla esimdi qyzdyń oqıǵasy baıandalady. Ol júzgishter komandasyna qosylǵysy keledi. Sóıtip, erkin ómir súrip, otbasyndaǵy qıyndyqtan qutylýǵa umtylady. Alaıda márege jeter tusta onyń ómirin ózgertetin tańdaý jasaýǵa májbúr bolady. Fılmde basty rólderdi Tomırıs Janǵazınova, lıtvalyq akter Valentın Novopolskıı, Ásel Qalıeva, Medına Saǵyndyqova oınaıdy.
Fılmniń álemdik premerasy tamyz aıynda Lokarno halyqaralyq kınofestıvalinde ótti. Keıin týyndy Ońtústik Koreıadaǵy Pýsan halyqaralyq kınofestıvaliniń baǵdarlamasyna endi.
Bul marapat otandyq kınoǵa degen qyzyǵýshylyqtyń artyp kele jatqanyn kórsetip, salaǵa bólingen memlekettik qoldaýdyń nátıjeli ekenin aıqyndaıdy.