Syr óńiri ekonomıkanyń kúretamyry sanalatyn otandyq jol ınfraqurylymyn jetildirýde taǵy bir jetistikke qol jetkizdi. Elimizdiń ońtústigin ortalyqpen baılanystyryp turǵan «Qyzylorda – Jezqazǵan» joly paıdalanýǵa berilip, Syr men Arqa arasy jaqyndaı tústi.
Aımaqtyń burynǵysy men búgingisin biletinder sonaý 80-jyldary Qyzylorda men Jezdi óńirdiń arasyn jalǵaıtyn kóne soraptyń 127 shaqyrymyna Mańǵystaý óńirinen ákelingen bıtým tóselgenin aıtady. Sol tósenishtiń tamtyǵy ǵana qalsa da III kategorııaǵa jatqyzylyp, keshege deıin kádege jarap keldi. 2000 jyldar basynda jergilikti kompanııalar joldyń 30 shaqyrymyn salyp, kóptiń kókeıinde úmit oıanyp edi. Biraq sol kezdegi ekonomıkalyq jaǵdaıǵa baılanysty jaqsy bastama orta joldan úzilip qaldy. Máselege Memleket basshysy nazar aýdarǵannan keıin ǵana kúre jol qurylysy bastalyp, 2023 jyly alǵashqy asfalti tósele bastady. Eki jyl ishinde 424 shaqyrymnyń oblys aýmaǵyndaǵy bóligi salynyp bitti.
Saltanatty rásimge oblys ákimi Nurlybek Nálibaev, «QazAvtoJol» UK» AQ basqarma tóraǵasy Darhan Imanashev, depýtattar men ardagerler qatysty. Aımaq basshysy bul joldyń óńir ekonomıkasyna, óndiristiń órkendeýine, turǵyndardyń ál-aýqatynyń artýyna tıgizetin oń yqpaly men erekshe mańyzyn atap ótti.
«Uzaq jyldan beri el armandap kelgen avtojoldy salýǵa qoldaý kórsetken Memleket basshysy Qasym-Jomart Toqaevqa barsha Syr jurtshylyǵynyń atynan zor rızashylyǵymyzdy, shynaıy alǵysymyzdy bildiremiz. Respýblıkalyq mańyzy bar avtomobıl joly týraly másele táýelsizdik alǵan kezeńnen beri birneshe márte kóterilgenin bilemiz. Búgin oblys aýmaǵyndaǵy bóligi tolyq qaıta jańǵyrtýdan ótip, tıisti jumys aıaqtaldy. Jobany júzege asyrýǵa 84 mlrd teńge jumsaldy», – dedi Nurlybek Nálibaev.
Qurylys jumysyna bes birdeı merdiger, 400 tehnıka jumyldyrylypty. Joldyń qalǵan bóligi keler jyly paıdalanýǵa berilmek. Sol kezde ońtústik óńirlerdi eldiń ortalyǵymen baılanystyratyn kúre jolmen táýligine 10 myńǵa deıin kólik qatynaı alady. Júk jáne jolaýshylar tasymaly ulǵaıady.
«Byltyr tamyz aıynan beri Ulytaý oblysy aýmaǵyndaǵy jumysqa kiristik. Osy kúni alǵashqy 50 shaqyrymyna asfalt-beton qospasy tóselip jatyr. Kelisimshartta eki aralyqtaǵy joldyń salynyp bitýi 2027 jyldyń aıaǵyna josparlanǵanymen de keler jyldyń sońyna deıin 208 shaqyrym qurylysty bitiremiz degen oıdamyz. Jezqazǵan – Qaraǵandy baǵytyndaǵy jumys ta kóp kúttirmeıdi. Ulytaý óńirinde 4 merdiger 8 nysan boıynsha qurylys júrgizedi», deıdi «QazAvtoJol» UK» AQ basqarma tóraǵasy Darhan Imanashev.
«Jol aktıvteri sapasynyń Ulttyq ortalyǵy» RMK mamandary jyl ishinde Qyzylorda bóligin 87 ret tekserip, 598 synama alypty. Aspaptyq tekserý barysynda anyqtalǵan aqaýlardyń da qalypqa keltirilýi baqylaýda tur.
Saltanatty rásimde aýqymdy jobanyń júzege asýyna úles qosqan qurylysshylar men ınjenerlerge, jol salasynyń mamandaryna «Qyzylorda oblysynyń damýyna qosqan úlesi úshin», «Eńbek ardageri», «Qurmetti jolshy» medaldary tabystaldy. Birqatar azamat Qyzylorda oblysynyń Qurmet gramotasymen, oblys ákiminiń Alǵys hatymen marapattaldy.
Jolshylar eńbegi arqasynda Shý baǵytyna qaraǵanda, Qyzylorda men Astana arasy 800 shaqyrymǵa jaqyndaı tústi. Buryn saparǵa shyqqandar eki aralyqta 20 saǵat jol júrse endi 16 saǵatta dittegen jerine barady. Ulytaý oblysynyń aýmaǵynda bastalǵan qurylys jumysy aıaqtalyp, jańa jol paıdalanýǵa berilgende, Astanaǵa baǵyt alǵan kólik 12 saǵatta jetedi.
Búginde oblysta «Qyzylorda – Jezqazǵan» jolyn «Batys Eýropa-Batys Qytaı» avtodálizine qosatyn 25 shaqyrymdyq aınalma jol salatyn merdiger mekeme anyqtalyp jatyr. Keler jyly bastalatyn «Qyzylorda – Sekseýil» baǵytyndaǵy 462 shaqyrymdyq 4 jolaqty jol qurylysy Syrdarııa, Jalaǵash, Qarmaqshy, Qazaly men Aral aýdandarynyń aýmaǵyn qamtıdy. Qyzylorda men Aqtóbeni jalǵap jatqan «Batys Eýropa – Batys Qytaı» avtodáliziniń eki jolaqty bóligin keńeıtýdiń bul bastamasy atalǵan aýdandar tirshiligine jan bitirip, kórshi oblystarmen alys-beris pen barys-kelis arta túsedi.
Qyzylorda