AQSh-Saýd Arabııasy ınvestısııa forýmynda sóz sóılegen Ilon Mask jasandy ıntellekt pen robototehnıka damyǵan saıyn jumys uǵymynyń ózgeretinin aıtty. Onyń paıymynsha, aldaǵy kezeńde adamdar kúnkóris úshin eńbek etýge májbúr bolmaıdy, al aqsha óziniń qazirgi mańyzyn birtindep joǵaltady, dep jazady Egemen.kz.
Sebebi JI taýar men qyzmettiń basym bóligin adam eńbeginsiz óndire alady, sol arqyly ekonomıkadaǵy qarjylyq shekteýler álsireıdi. Degenmen energııa men shıkizat tapshylyǵy sekildi faktorlar mańyzyn joǵaltpaıdy.
Mask bolashaqtaǵy eńbek qatynasyn sportpen aınalysý, baý-baqsha kútý sekildi isterdi adam óz jan qalaý úshin ǵana jasaıdy deıdi. Onyń pikirinshe, jumys hobbıǵa aınalady. Kásipker Ien Benkstiń «Mádenıet» ǵylymı-fantastıkalyq serııasyn mysalǵa keltirip, onda sýrettelgen qajettiligi joıylǵan qoǵamnyń keıbir elementteri shynaıy ómirde iske asýy múmkin ekenin aıtty.
Keıingi ýaqytta Mask jasandy ıntellekt pen robottar kedeılikti tolyq joıýǵa qabiletti degen pikirin jıi aıtady. Investorlarmen kezdesýinde ol «Optimus» roboty ár adamǵa joǵary ómir sapasyn qamtamasyz ete alady dep atap ótti. Onyń aıtýynsha, memleketter bolashaqta ámbebap bazalyq tabyspen shektelmeı, jalpyǵa ortaq joǵary tabys júıesin engizýge májbúr bolýy múmkin.