Úkimet osy jyldyń 21 qarashasyndaǵy Qaýlysymen 2026 jylǵy 1 qańtardan bastap ózin-ózi jumyspen qamtyǵandar úshin jańa Arnaýly salyq rejımin (ASR) qoldanýǵa ruqsat etiletin 40 qyzmet túriniń tizimin bekitti, dep habarlaıdy Egemen.kz.
Bul sheshim – azamattardyń ekonomıkalyq belsendiligin yntalandyrýǵa, salyqtyq eseptilikti jeńildetýge jáne ózin-ózi jumyspen qamtý sektoryndaǵy kiristerdi zańdastyrýǵa baǵyttalǵan aýqymdy reformanyń bir bóligi.
Jańa ASR jeke kásipker (JK) mártebesi joq jáne jaldamaly qyzmetkeri joq azamattardyń zańdy túrde jumys isteýine barynsha qarapaıym ári qoljetimdi tetik retinde ázirlengen.
О́zin-ózi jumyspen qamtyǵandarǵa arnalǵan ASR-diń negizgi artyqshylyqtary men erekshelikteri:
- JK retinde tirkelýdiń qajeti joq;
- Aıyna 300 AEK-ke deıingi shekti tabys;
- Áleýmettik tólemderdi ǵana qamtıtyn biryńǵaı 4% mólsherleme;
- Platforma/qosymsha arqyly jumys isteý talaby joq;
- Jaldamaly qyzmetkerlerdi alýǵa tyıym salynady;
- Jumys isteý tetigi tańdalady: akkredıttelgen ınternet-platforma arqyly nemese Qarjy mınıstrligine qarasty Memlekettik kirister komıtetiniń mobıldi qosymshasy arqyly.
Áleýmettik tólemderdi 4%-dyq biryńǵaı mólsherlemege engizý ózin-ózi jumyspen qamtyǵan azamattarǵa áleýmettik qamsyzdandyrylýǵa, zeınetaqy jınaqtaryna jáne medısınalyq saqtandyrýǵa qol jetkizýge múmkindik beredi. Osy arqyly olar buǵan deıin negizinen resmı túrde jumys isteıtin azamattarǵa ǵana qoljetimdi bolǵan áleýmettik qorǵaýmen qamtamasyz etiledi.
Bıznesti qoldaý: shyǵyndardy shegerimge jatqyzý
О́zin-ózi jumyspen qamtyǵandarmen jumys isteıtin kompanııalar úshin mańyzdy yntalandyrý tetikteriniń biri – salyqtyq shegerimder. О́zin-ózi jumyspen qamtyǵan azamattarmen jasalǵan mámileler boıynsha shyǵyndardy korporatıvtik tabys salyǵy (KTS) nemese jeke tabys salyǵy (JTS) boıynsha salyq salynatyn tabysty esepteý kezinde shegerimge jatqyzýǵa bolady.
Bul qadam naryqtyń ashyqtyǵyna yqpal ete otyryp, bıznesti ózin-ózi jumyspen qamtyǵan azamattardyń qyzmetin zańdy túrde tartýǵa yntalandyra túsedi.
Bekitilgen tizim ózindik jumyspen qamtý salasynda eń kóp taralǵan 40 qyzmet túrin qamtıdy.
Ruqsat etilgen qyzmettiń negizgi sanattary:
- Turmystyq jáne jóndeý qyzmetteri: kompıýterlerdi, turmystyq tehnıkany, kıim-keshekti, aıaq kıimdi, jıhazdy, zergerlik buıymdardy jóndeý, sondaı-aq sylaq, syrlaý, aǵash ustalyǵy jáne basqa da sheberlik jumystary.
- Shyǵarmashylyq jáne zııatkerlik qyzmetter: kórkem jáne ádebı shyǵarmashylyq, fotosýret, aýyzsha jáne jazbasha aýdarma, sondaı-aq sport, demalys jáne mádenıet salasyndaǵy bilim berý.
- Jalǵa berý jáne kólik qyzmetteri: taksı qyzmeti, turǵyn úıdi jalǵa berý (sýbarenda), jeke qoldanystaǵy zattardy jalǵa berý.
- Internet-platformalar arqyly kórsetiletin qyzmetter: tek ınternet-platformalar arqyly kórsetiletin qosymshai kommersııalyq qyzmetter.
Jańa rejım bekitilgen tizimge kirmeıtin qyzmet túrlerimen aınalysatyn azamattarǵa qoldanylmaıdy.
Jańa ASR-di engizý – ekonomıkanyń edáýir bóligin kóleńkeden shyǵarýda, ózin-ózi jumyspen qamtyǵan azamattardy tolyqqandy áleýmettik qorǵaýda jáne olardy resmı eńbek naryǵyna ıntegrasııalaýda mańyzdy qadam. Bul jeńildetý ákimshilik júktemeni azaıtyp qana qoımaı, zańdy ekonomıkalyq statıstıkanyń qalyptasýyna da yqpal etedi.
Jańa ASR – shaǵyn bıznes pen ózin-ózi jumyspen qamtyǵandardy qoldaýǵa baǵyttalǵan revolıýsııalyq qadam. Bul tek tómen mólsherleme ǵana emes, barynsha ońaılatylǵan tetik te bolyp esepteledi. Adam óz tabysynan 4% mólsherinde tólemdi yńǵaıly qosymsha arqyly tólep, ózinde zeınetaqy aýdarymdary men medısınalyq qyzmetke qoljetimdilik bar ekenine senimdi bola alady. Bul – memleket úshin de, ózin-ózi jumyspen qamtyǵan árbir azamat úshin de ózara tıimdi sheshim.