Astanadaǵy Ulttyq akademııalyq kitaphanada Halyqaralyq «16 kún zorlyq-zombylyqsyz» aksııasyna arnalǵan dóńgelek ústel jıyny uıymdastyryldy. Bul Prezıdent janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııanyń uıymdastyrýymen, BUU-Áıelder qurylymynyń tehnıkalyq qoldaýymen ótkizildi.
Is-shara memlekettik organdar, halyqaralyq uıymdar, sarapshylar qaýymdastyǵy jáne azamattyq qoǵam ınstıtýttarynyń ókilderin biriktirdi. Qatysýshylar áıelder men balalardyń qaýipsizdigin nyǵaıtý boıynsha júıeli sharalardy, sondaı-aq osy saladaǵy memlekettik saıasatty odan ári jetildirý joldaryn talqylady.
«16 kún zorlyq-zombylyqsyz» aksııasy jyl saıyn 25 qarashadan 10 jeltoqsanǵa deıin álemniń 90-nan asa elinde ótkiziledi jáne qoǵamnyń zorlyq-zombylyq máselesine habardarlyǵyn arttyrýǵa, zorlyqqa nóldik tózimdilik mádenıetin qalyptastyrýǵa baǵyttalǵan. Qazaqstan dástúrli túrde bul bastamany qoldaıdy, al Ulttyq komıssııa elimiz boıynsha is-sharalardy úılestirip, memlekettik organdar, úkimettik emes uıymdar jáne azamattyq qoǵam ınstıtýttarynyń kúsh-jigerin biriktiredi.
Dóńgelek ústeldiń moderatory – Ulttyq komıssııa tóraǵasynyń orynbasary, Ulttyq keńes múshesi, advokat, quqyq qorǵaýshy Aıman Ýmarova. Is-sharada Konstıtýsııalyq keńes tóraıymy Elvıra Azımova, Qazaqstandaǵy BUU-Áıelder qurylymynyń ókili Djeren Gıýven Gıýres jáne QR Adam quqyqtary jónindegi ýákili Artýr Lastaev sóz sóıledi.
Sondaı-aq jetekshi sarapshylar men memlekettik organdardyń ókilderi baıandama jasady. Bas prokýrordyń orynbasary kıberzorlyqtyń qazirgi qaterleri jáne prokýratýra tarapynan qabyldanyp jatqan jaýap sharalary týraly baıandady. «One-Stop-Service» jobasynyń úılestirýshisi Lıazzat Rakısheva Ulttyq komıssııa bastamasyn iske asyrý tájirıbesimen bólisti. Ádilet vıse-mınıstri áıelder men balalardy qorǵaýǵa qatysty jańa zańnamalyq sharalardy talqylady. Al Zýlfııa Baısakova daǵdarys ortalyqtarynyń birinshi qorǵaý jelisi retindegi rólin jáne erte aralasýdyń mańyzdylyǵyn atap kórsetti. Ulttyq komıssııanyń tóraǵa orynbasary Elena Tarasenko memleket, úkimettik emes uıymdar, halyqaralyq uıymdardyń 1 325 rezolıýsııasy aıasyndaǵy seriktestigi týraly aıtyp berdi. Zań ǵylymdarynyń doktory Marat Qoǵamov qylmystyq proseste áıelderdiń qatysý erekshelikterin túsindirip ótti. Baıan Jandosova zorlyq qurbandaryn qalpyna keltirý tájirıbesimen bólisti.
Arnaıy nazar reprodýktıvti densaýlyqty qorǵaýǵa, áıelderdiń ekonomıkalyq derbestigin arttyrýǵa, ákelerdi profılaktıkalyq jumysqa belsendi tartýǵa, sondaı-aq qaýipsiz qoǵam qalyptastyrýǵa arnalǵan sıfrlyq platformalardy damytýǵa baǵyttalmaq. Bir mezette vedomstvolar arasyndaǵy ózara is-qımyldy kúsheıtý jáne azamattyq qoǵam ınstıtýttarymen tıimdi áriptestik ornatý máseleleri de – basty nazarda.
Ulttyq komıssııanyń málimdeýinshe, zorlyq-zombylyqqa nóldik tózimdilikti qalyptastyrý – uzaqmerzimdi ári júıeli tásildi talap etetin úderis. Bul baǵytta quqyqtyq mádenıetti damytý, memlekettik organdar, sarapshylar qaýymdastyǵy jáne úkimettik emes uıymdardyń kúsh-jigerin biriktirý sheshýshi ról atqarady.
Dóńgelek ústel sońynda áıelder men balalardy qorǵaý bastamalaryn ilgeriletýdegi úlesi úshin belsendi qatysýshylar men sarapshylarǵa Alǵyshat tabys etildi.