Qazaqstan halqynyń bank depozıtteri 27 trln teńgege jaqyndap qaldy. Bir jyl ishinde olardyń kólemi 17,6 paıyzǵa nemese shamamen 4 trln teńgege artqan. Sonymen qatar ortasha syıaqy mólsherlemesi de ósti, dep jazady Egemen.kz.
Ulttyq banktiń málimetinshe, 2025 jylǵy qazan aıynda el bankterindegi depozıtter kólemi 26,7 trln teńgege jetken. Bul ótken jylmen salystyrǵanda 17,6 paıyzǵa kóp.
Depozıtterdiń basym bóligi – 20,6 trln teńge (77,42 paıyz) ulttyq valıýtada saqtalýda. Qalǵan 6 trln teńge (22,58 paıyz) shetel valıýtasyndaǵy salymdar. Bir aı ishinde teńgedegi depozıtter shamamen 1 paıyzǵa, valıýtalyq salymdar 1,4 paıyzǵa ósken.
Qazirgi kezde jınaq depozıtterde 3,9 trln teńge, merzimdi jáne merzimsiz depozıtterde 19,3 trln teńge, shartty salymdarda 6,3 mlrd teńge saqtalyp otyr. Sondaı-aq 3,5 trln teńgege jýyq qarajat talap etilgenge deıingi jáne aǵymdaǵy shottarda, ıaǵnı halyqtyń bank kartalarynda tur.
2025 jylǵy 1 qarashadaǵy jaǵdaı boıynsha depozıtter qurylymy: – teńgede: 20,6 trln teńge – shetel valıýtasynda: 6,1 trln teńge – jalpy: 26,7 trln teńge
Salymdardyń artýyna baılanysty bankter depozıttik ónimder boıynsha talaptaryn da birtindep jaqsartyp keledi. Máselen, Ulttyq bank derekterine súıensek, ótken jyly qazan aıynda ashylǵan depozıtterdiń ortasha naryqtyq mólsherlemesi 13,1 paıyz bolsa, bıyl bul kórsetkish 14,6 paıyzǵa deıin ósken.
Bul ósimge eldegi aqsha-nesıe saıasatynyń qataıýy da áser etti. Qazan aıynda Ulttyq bank bazalyq mólsherlemeni 18 paıyzǵa deıin kótergen edi. Sonyń nátıjesinde ekinshi deńgeıli bankter de salymshylardy kóbirek tartý úshin depozıttik mólsherlemelerin arttyrdy.