Qazaqstanda medısınalyq qyzmetterdiń qoljetimdiligine qatysty shaǵymdar kóbeıgen, dep habarlaıdy Egemen.kz.
Pasıentter taldaý tapsyrý, KT men MRT sekildi zertteýlerden ótý úshin aptalap, keıde aılap kezek kútýge májbúr.
Májilis depýtattary densaýlyq saqtaý mınıstri Aqmaral Álnazarovanyń atyna joldaǵan saýalynda sońǵy jyldary medısınalyq qyzmetter baǵasynyń óskenin, al qoljetimdiliktiń eki esege tómendegenin atap ótti. Olardyń aıtýynsha, memlekettik klınıkalarda qyzmet kórsetý merzimderi sozylyp ketkendikten, azamattar jeke ortalyqtarǵa júginip, aqyly zertteýlerge aqsha jumsaýǵa májbúr.
Depýtattar eger qajetti qyzmetti memlekettik uıym kórsete almasa, pasıentterdi jeke klınıkalarǵa joldap, shyǵyndy mindetti medısınalyq saqtandyrý qory esebinen óteýdi usyndy.
Depýtattyq saýalǵa jaýap bergen Densaýlyq saqtaý mınıstrligi klınıka 10 kún ishinde qajetti qyzmetti usyna almasa, pasıent basqa medısınalyq uıymǵa kedergisiz óte alatynyn málimdedi.
«Eger pasıent qordyń reestrindegi jetkizýshiler qatarynda bolsa, ol qajetti qyzmetti alý úshin basqa klınıkany tańdaýǵa quqyly. Joldama rásimdelgen kezde tańdalǵan klınıkamen kelisimshart aqparattyq júıede avtomatty túrde jasalady», – delingen mınıstrlik habarlamasynda.
Mınıstrlik memlekettik uıym qajetti qyzmetti kórsete almaǵan jaǵdaıda pasıentti jeke klınıkaǵa jiberip, shyǵyndy mindetti medısınalyq saqtandyrý qory arqyly óteý múmkindigi qarastyrylyp jatqanyn da atap ótti.
Uzaq kútý, joldama berilmeýi nemese zertteý qoljetimsizdigine baılanysty qıyndyqtar týyndaǵan jaǵdaıda, azamattarǵa qordyń baılanys ortalyǵyna nemese Qoldau 24/7 mobıldi qosymshasy arqyly shaǵymdaný usynylady.