Biryńǵaı jınaqtaýshy zeınetaqy qory (BJZQ) 2025 jylǵy 1 qarashadaǵy jaǵdaı boıynsha zeınetaqy aktıvterin basqarý týraly esepti jarııalady. Ulttyq bank (UB) pen ınvestısııalyq portfeldi basqarýshylar (IPB) basqaratyn qarajattyń jalpy kólemi 25,8 trln teńgege jetken, dep habarlaıdy Egemen.kz.
BJZQ málimetinshe, aktıvterdiń negizgi bóligi 25,1 trln teńge – azamattardyń mindetti jáne erikti jarnalary esebinen qalyptasqan jáne Ulttyq banktiń senimgerlik basqarýynda tur. Taǵy 641 mlrd teńge jumys berýshilerdiń mindetti zeınetaqy jarnalary da (JBMZJ) Ulttyq banktiń basqarýynda. Al jeke basqarýshy kompanııalardyń (JBK) úlesinde 80,5 mlrd teńgeden astam aktıv bar.
Kiristilik
Sońǵy 12 aıda (2024 jylǵy qarasha – 2025 jylǵy qazan aralyǵy) Ulttyq bank negizgi portfeli boıynsha ınvestısııalyq tabys 2,82 trln teńge, al tabystylyq 12,58% boldy. Bul kórsetkish osy kezeńdegi ınflıasııa deńgeıine (12,60%) is júzinde teń.
Portfel qurylymy (Ulttyq bank)
2025 jylǵy 1 qarashadaǵy jaǵdaı boıynsha zeınetaqy aktıvteri tómendegideı bólindi:
- 42%-dan astamy – Qarjy mınıstrliginiń memlekettik baǵaly qaǵazdary;
- shamamen 9% – kvazımemlekettik kompanııalardyń oblıgasııalary;
- aktıvterdiń 57,5% – teńgemen, 42,5% – AQSh dollarymen nomınırlengen.
Jeke basqarýshy kompanııalardyń nátıjeleri
Jyl qorytyndysy boıynsha eń joǵary tabystylyqty kórsetken kompanııa:
- Sentras Sekıýrıtız AQ – 18,20%
Basqa iri IPB nátıjeleri:
- Halyk Global Markets AQ – 13,26%
- Alatau City Invest AQ – 13,04%
- Halyk Finance AQ – 13,15%
- BCC Invest AQ – 12,23%
BJZQ eskertýi
Qor zeınetaqy jınaqtary uzaq merzimdi ınvestısııalar ekenin eske salady. Olardyń tıimdiligin keminde bir jyldyq kezeńmen baǵalaý qajet. Portfeldi ártaraptandyrý jınaqtardyń saqtalýyn jáne uzaq merzimdi tabystylyǵyn qamtamasyz etýge baǵyttalǵan.