ASTANA. 22 naýryz. Qostanaı qalasyndaǵy «Saltanat saraıynda» erekshe neke qııý rásimi ótti. Oǵan oblys ákimi Nuraly Sádýaqasov qatysyp, jas jubaılar – Áset jáne Anar Súndetbaevtarǵa Prezıdenttiń quttyqtaý hatyn tabystady. Bul týraly today.kz habarlady.
Áset buǵan deıin Nursultan Nazarbaevqa hat jazyp, óziniń úılený toıyna shaqyrypty. Ol – Táýelsizdiktiń qurdasy. Rýdnyı ındýstrıaldyq ınstıtýtyn bitirgen. Qazirgi tańda Magnıtogorsk memlekettik tehnıkalyq ýnıversıtetinde «metallýrg» mamandyǵy boıynsha oqyp jatyr. Al jubaıy Anar atalǵan oqý ornynda qurylysshy mamandyǵy boıynsha bilim alýda.
Áset Memleket basshysyn úlgi tutady eken. Sondyqtan da ol metallýrg mamandyǵyn tańdapty.
Á.Súndetbaev táýekelge bel baılap, Prezıdentke úılený toıyna shaqyrý maqsatymen jazǵan hatyna jaýap kelgende, qýanyshynda shek bolmapty.
Áset: «Prezıdenttiń qyzmetin, eńbek jolyn úlgi tutamyn. Memleket basshysynyń arqasynda jastar shetelde oqýda. Myna men de jubaıym ekeýimiz Reseıde bilim grantmen oqyp jatyrmyz. Nursultan Nazarbaevty úılený toıyma shaqyramyn dep dostaryma aıtqanymda olar senbedi. Jumysynyń kóptigine qaramastan, meniń hatyma jaýap bergenine rızamyn, – dedi.
Al oblys ákimi Nuraly Sadýaqasov Elbasynyń óz qolymen jazǵan quttyqtaý hatyn tabystady jáne jas jubaılarǵa teledıdar syılady.
N.Sádýaqasov: «Úılený toıynda Prezıdenttiń quttyqtaý hatyn alý - úlken mártebe. Elimizde osyndaı jas otaýlar kóbeıe bersin», – dedi.
Joldybaı Bazar.
Derek, sýret: today.kz.