Memleket basshysy Qasym-Jomart Toqaev elimizdegi kásipkerlerdi qoldaý úshin yńǵaıly sıfrlyq ekojúıe qalyptastyrý qajet ekenin aıtty, dep habarlaıdy Egemen.kz.
Qazir EgovBusiness platformasy jumys istep tur. Sonyń arqasynda memleket tarapynan kórsetiletin qyzmetter qoljetimdi bola túsken.
«Kásipkerlerdiń jumysy jeńildep, qaǵazbastylyq azaıdy. Bıyldyń ózinde osy qosymsha arqyly 4,6 mıllıonnan astam qyzmet kórsetildi. Endi platformany Bıznestiń sıfrlyq kartasymen ózara baılanystyrý jumysyn aıaqtaý qajet.
Sonymen birge osy platformaǵa jergilikti atqarýshy organdar kórsetetin qyzmet túrlerin qosý kerek. Bul sharalar kásipkerlerdiń birtutas platforma arqyly ártúrli qyzmet alýyna múmkindik beredi. Sondaı-aq platformada jasandy ıntellekt kómegimen bıznes júrgizýge qatysty tolyqqandy keńes alýǵa bolady», deıdi Prezıdent.
Memleket basshysynyń aıtýynsha, mundaı qadam ákimshilik kedergilerdi azaıtyp, memlekettik qoldaý sharalarynyń ashyq ári tıimdi bolýyna yqpal etedi.