10 jeltoqsan kúni keshke saǵat 17.15-te Qaraǵandy oblysy Moıynty – Shyǵanaq ýchaskesinde oqys oqıǵa oryn aldy. Júk poıyzy jol jóndeý jumystaryn júrgizip jatqan jumysshylardy qaǵyp ketken. Mashınıst shuǵyl tejelýdi qoldanǵanymen, apattyń aldyn alý múmkin bolmady. Tórt adam qaza tapty, dep habarlaıdy Egemen.kz «Qazaqstan temir joly» ulttyq kompanııasynyń baspasóz qyzmetine silteme jasap.
Oqıǵanyń sebepteri men tolyq mán-jaıyn anyqtaý úshin QTJ Basqarma tóraǵasynyń tapsyrmasymen arnaıy komıssııa quryldy.
Komıssııany ulttyq kompanııanyń bas ınjeneri basqarady. Onyń quramyna «QTJ – Júk tasymaly» JShS jáne Magıstraldyq jeli dıreksııasynyń basshylary kirgen. Komıssııa músheleri dereý oqıǵa ornyna baryp, tergeý jumystary bastaldy.
Qaza tapqandardyń otbasylaryna barlyq qajetti kómek kórsetiledi.
Qaraǵandy oblysy