Qazaq ádebıetine ózindik órnegimen, mánisti maqamymen sony soqpaq qaldyrǵan klassık jazýshy, kórkemsózdiń kóshbasshysy Marhabat Baıǵuttyń týǵanyna 80 jyl tolýyna oraı bıyl aıtýly is-sharalar uıymdastyryldy. Jyl boıy ótken jaqsy bastama kúni keshe Tashkentte de jalǵasyn tapty. О́zbekstan Jazýshylar odaǵynda «Túrki álemine qyzmeti úshin» syılyǵynyń laýreaty atanǵan sańlaq qalamgerdiń ózbek tilinde jaryq kórgen «Kım oshdı savdosı» atty jańa jınaǵynyń tusaýkeser rásimi ótti.
Jazýshynyń týyndylary orys, ýkraın, ózbek, túrik, saha, qaraqalpaq tilderine aýdarylǵan. О́zbekstandyq jazýshy, fılologııa ǵylymdarynyń doktory Qazaqbaı Iýldashev Túrkistanda ótken Marhabat Baıǵuttyń 80 jyldyǵyna arnalǵan halyqaralyq sımpozıýmda: «Marhabat Baıǵuttyń týyndylary ózbek oqyrmandaryna jaqsy tanys. Týysqan eki eldiń bir-birinen irgesin ajyratpaýlaryna negiz bolatyn osyndaı dúnıeler kóp bolsa eken. Qazir men Marhabattyń shyǵarmalaryn aýdarýǵa birjolata bet burdym», degen bolatyn. Tashkenttegi tusaýkeser rásiminde «Kım oshdı savdosı» atty jańa jınaqtyń alǵysózin jazǵan Qazaqbaı Iýldashevke alǵys bildirdik. Halyqaralyq is-sharaǵa qazaq-ózbek zııaly qaýymynyń arasyna altyn kópir bolyp júrgen «Ijodkor» ádebı birlestiginiń qurmetti tóraǵasy Abdırahım Pratov pen qazirgi tóraǵa Zakırjon Mýmınjonov atsalysqanyn aıta ketelik. «Ijodkor» ádebı birlestiginiń atynan О́zbekstan Jazýshylar odaǵynyń tóraǵasy, áıgili aqyn Sırojıddın Saıııd bastaǵan birneshe ózbekstandyq qalamgerge «Marhabat Baıǵuttyń týǵanyna 80 jyl» jobasyna qoldaý kórsetkenderi úshin Alǵyshat pen azdaǵan syı-sııapat tapsyrdyq.
Al Marhabat kókemniń aıaýly jary Qyzdarkúl Pernebaıqyzynyń syılyǵy tipti erekshe boldy. Ol ózi ómir boıy qabaǵyn baǵyp ótken qalamgerdiń 7 tomdyq jınaǵy men bir dorba shaǵylǵan jańǵaqty tartý etti. Jańǵaq klassık jazýshynyń kindik qany tamǵan Taýpistelidegi qara shańyraǵyndaǵy Nasyr men Sherhan baýynda ósip turǵan ónim ekenin estigen eldiń kóńili tolqydy, júregi tebirendi. Maqańnyń qalamdastary men taǵlym-tárbıesin, qamqorlyǵyn kórgen talaı shákirtteriniń basqosýymen kóptegen ádebı is-sharalar ótken bul jóni bólek, josyǵy erek baýdyń kóshetterin bir kezderi qazaq-ózbek ádebıetiniń alyptary, eki eldiń rýhanııatyna ajyramas baılanys ornatqan Sherhan Murtaza men Nasyr Fazylov óz qoldarymen ekkeni tasqa qashalǵan tamasha tarıh, óshpes ónege.
О́zbekstan Jazýshylar odaǵynda ótken rásimge qatysqan aqyn-jazýshylar men jastar, stýdentter daryndy dramatýrg, tarıhı týyndylarymen de tanymal qalamger Saıa Qasymbektiń áserge toly áńgimesin súısine tyńdady. Qalamger túrki dúnıesiniń birligine, rýhanı baılanysyna, ózara sabaqtastyǵyna toqtaldy. El yntymaǵyn, dala dıplomatııasyn, qazaqtyń tóbe bıi, dańqty Tóle bı týraly tarıhı derekpen tamyrlastyra baıandaǵanyna kópshilik tánti. Al Qazaqstan Jazýshylar odaǵynyń Túrkistan oblystyq ókildiginiń jetekshisi, halyqaralyq «Alash» syılyǵynyń laýreaty Aıdar Seıdazym О́zbekstan Jazýshylar odaǵynyń eńseli ǵımaratynda uıymdastyrylǵan Marhabat Baıǵuttyń ózbek tilindegi áńgimeler jınaǵynyń tusaýkeser rásimi ádebıetke degen qurmettiń, mádenı baılanysqa degen adaldyqtyń jarqyn úlgisi ispetti bolǵanyn jetkizdi. Baýyrlas eldiń jazýshylary qazaq qalamgeriniń shyǵarmashylyǵyna tereń taldaý jasaǵanyna, biri onyń qarapaıym aýyl ómirin fılosofııalyq tereńdikpen sýretteýin tilge tıek etkenine, endi biri kórkem tildiń tazalyǵy men adam minezin ashýdaǵy sheberligin erekshe atap ótkenine jan-jaqty toqtaldy.
Sondaı-aq Tashkent tórindegi basqosýda zııaly qaýym «Marhabat Baıǵut atyndaǵy Ádebıetshiler úıin ashý» týraly bastamanyń óte oryndy ekenin aıtyp, júzege asyrylýyna tilektestik bildirdi.
Shymkent – Tashkent – Shymkent