Qazaqstannyń daıyn ónim eksporty О́zbekstanmen salystyrǵanda birneshe ese joǵary. Bul týraly ózbek ekonomısi, Ekonomıkalyq damýǵa járdemdesý ortalyǵynyń dırektory Iýlıı Iýsýpov «Seredin» podkastynda aıtty, dep habarlaıdy Egemen.kz.
Ekonomıst Qazaqstan men О́zbekstan ekonomıkalaryn jıi salystyrý máselesine toqtalyp, eksport qurylymy men daıyn ónim óndirisiniń kólemine nazar aýdardy. Onyń aıtýynsha, Qazaqstanda el ekonomıkasy men memlekettik shyǵystarǵa qatysty syn jıi aıtylǵanymen, obektıvti kórsetkishter eldiń áldeqaıda turaqty pozısııada ekenin kórsetedi.
«Eger saýda aınalymyna qarasańyz, Qazaqstannan О́zbekstanǵa eksport kólemi bizden Qazaqstanǵa baratyn eksporttan aıtarlyqtaı joǵary. Demek, qazaqstandyqtardyń satatyn ónimi bar», dedi Iýlıı Iýsýpov.
Ekonomıst bul aıyrmashylyqtar kóbine tabıǵı resýrstarǵa baılanysty ekenin atap ótti. Alaıda soǵan qaramastan, Qazaqstan óńdelgen, daıyn ónim eksporty boıynsha absolıýtti kórsetkishterde joǵary nátıje kórsetip otyr.
«Eksport qurylymyn salystyrsaq, Qazaqstanda tabıǵı resýrstardyń úlesi joǵary ekeni anyq. Biraq soǵan qaramastan, eger daıyn ónim eksportyn absolıýtti mánde, ıaǵnı mıllıardtaǵan dollarmen eseptesek, Qazaqstannyń daıyn ónim eksporty О́zbekstannan aıtarlyqtaı, birneshe ese artyq», dedi ol.
Iýsýpovtyń aıtýynsha, bul jaǵdaı Qazaqstannyń shıkizat eksportyna táýeldiligi joǵary bolǵanyna jáne О́zbekstan halqynyń sany Qazaqstanǵa qaraǵanda shamamen eki ese kóp ekenine qaramastan júzege asyp otyr.
«Biz Qazaqstanǵa qaraǵanda shıkizat eksportyna onsha táýeldi emespiz. Soǵan qaramastan, Qazaqstan daıyn ónimdi birneshe ese kóp óndiredi», dep túıindedi ekonomıst.
Podkast barysynda sondaı-aq qoǵamdaǵy ekonomıkalyq jaǵdaıǵa qatysty qabyldaý naqty makroekonomıkalyq kórsetkishtermen árdaıym sáıkes kele bermeıtini, ásirese Ortalyq Azııa elderin salystyrý kezinde bul anyq baıqalatyny aıtyldy.