AQSh prezıdenti Donald Tramp Venesýeladaǵy qazirgi bılikti «sheteldik terrorıstik uıym» dep jarııalap, sanksııaǵa ilikken munaı tankerlerine qatań shekteý engizý jóninde pármen berdi. Sóıtip bul elge qatynaıtyn jáne odan shyǵatyn barlyq sanksııalanǵan munaı tankerlerine teńizdik bóget qoıýdy tapsyrdy, dep jazady Egemen.kz.
Aq úıdiń basshysy Truth Social áleýmettik jelisindegi jazbasynda Venesýela bıligin mundaı sheshimge jetkizgen sebepterdi tizip aıtty. Onyń aıtýynsha, venesýelalyq rejım AQSh aktıvterin zańsyz ıemdenip qana qoımaı, terrorızmge, esirtki kontrabandasyna jáne adam saýdasyna qatysy bar.
«Bizdiń aktıvterimizdi urlaǵany jáne terrorızm, esirtki tasymaly men adam saýdasy sekildi kóptegen qylmystyq áreketteri úshin Venesýela rejımi sheteldik terrorıstik uıym dep jarııalandy», dep jazdy Donald Tramp.
Sonymen qatar AQSh prezıdenti Venesýela tóńiregindegi áskerı belsendiliktiń kúsheıetinin eskertti. Onyń aıtýynsha, bul el buryn-sońdy bolmaǵan aýyr qysymǵa tap bolady.
«Olar úshin shok buryn-sońdy bolmaǵan deńgeıde bolady. Bul AQSh-qa urlanǵan munaıdy, jerdi jáne ózge de aktıvterdi tolyq qaıtarǵanǵa deıin jalǵasady», dep málimdedi Tramp.
Onyń sózinshe, Nıkolas Madýronyń «zańsyz rejımi» urlanǵan munaı ken oryndarynan alynǵan resýrstardy óz qyzmetin qarjylandyrýǵa, sonyń ishinde esirtki terrorızmine, adam saýdasyna, kisi óltirý men adam urlaýǵa jumsap otyr.
AQSh basshysynyń bul málimdemesi halyqaralyq deńgeıde Venesýelaǵa qatysty qysymnyń jańa kezeńi bastalýy múmkin ekenin ańǵartady.