Bul jobanyń irgetasy 2020 jyly qalanǵanymen, 2022 jyly Naýryzbaı aýdanynyń qarqyndy damýyna baılanysty stansııanyń ornalasý baǵytyna túzetýler engizilgen bolatyn. Qurylys jumystaryna 28 mlrd teńge bólinip, alǵashqy jospar boıynsha nysan 2026 jyldyń birinshi jartyjyldyǵynyń sońynda aıaqtalýy tıis edi. Alaıda ákimdik atqarylatyn jumystardyń kestesin qaıta qarap, merzimdi barynsha qysqartý týraly sheshim qabyldady.
«Maýsym aıynda metro qurylysymen tanysqanymda, mamandar «Qalqaman» stansııasyn aıaqtaýǵa 24 aı qajet ekenin aıtqan bolatyn. Qazir biz bul jumystardy 8-9 aıdyń ishinde támamdaýdy josparlap otyrmyz. Mundaı mańyzdy jobalar barynsha jedel júzege asyrylýy tıis», dedi Darhan Satybaldy.
Ákimniń aıtýynsha, qaladaǵy keptelis máselesi ekologııalyq jaǵdaıǵa tikeleı áser etedi – aýanyń 60%-ǵa lastanýy dál osy kólik quraldaryna tıesili. Sondyqtan bılik Shanhaı, London jáne Máskeý sııaqty iri megapolısterdiń tájirıbesin zerdeleı otyryp, jeke kólikke qaraǵanda qoǵamdyq kóliktiń úlesin arttyrýdy kózdep otyr.
Sonymen qatar kelesi jyly «Qalqaman» stansııasy men «Barlyq» bazarynyń arasyn jalǵaıtyn uzyndyǵy 5,3 shaqyrym bolatyn jańa ýchaskeniń qurylysy bastalady. Sondaı-aq qala bıligi metronyń ekinshi jelisin jobalaýǵa kiristi: bul baǵyt «Jibek joly» stansııasynan áýejaıǵa deıingi 14 shaqyrymdy qamtıdy.