ASTANA. 23 aqpan. Qazaqstan Syrtqy ister mınıstrligi Reseıdiń Qazaqstanǵa ózara jer almasý jóninde usynys jasaǵany týraly aqparattarǵa qatysty túsinik berdi. Bul týraly Almaty.tv tilshisi mınıstrliktiń baspasóz qyzmetine silteme jasaı otyryp habarlady.
«Reseı Federasııasy Omby oblysynyń gýbernatory V. Nazarovtyń Qazaqstanmen terrıtorııa almasý boıynsha usynysy týraly aqparatqa nazar aýdardyq. QR men RF arasyndaǵy memlekettik shekarany demarkasııaǵa qatysty máseleler tek qana Birlesken qazaqstandyq-reseılik komıssııanyń quzyretine jatatyndyǵyn habarlaımyz. Osy komıssııadaǵy RF delegasııasy Qazaqstanǵa mundaı usynys jasaǵan joq», - delingen habarlamada.
Vedomstvanyń aqparaty boıynsha, Reseılik tarap usynys jasaıtyn bolsa, másele qalyptasqan kelissózder úderisi jáne halyqaralyq tájirıbege sáıkes qarastyrylatyn bolady.
Esterińizge sala ketsek, osyǵan deıin qazaqstandyq BAQ -ta Omby oblysynyń gýbernatory Vıktor Nazarov Qazaqstanǵa Reseıdiń ońtústigindegi birneshe jer telimin berýdi usyndy. Esesine ol Qazaqstannan Omby - Rýsskaıa Polıana tas jolynyń 10 shaqyrymǵa jýyq ýchaskesin suraıdy degen aqparat jarııalanǵan bolatyn.
Murat Aıtqoja.