Attestattaý – memlekettik qyzmetshiniń áleýetin aıqyndaıdy

Memlekettik qyzmet salasyndaǵy júzege asyrylatyn ózgerister jaıy Ortalyq kommýnıkasııalar qyzmetinde Memlekettik qyzmet isteri jáne sybaılas jemqorlyqqa qarsy is-qımyl agenttiginiń departament dırektory Álı Kómekbaev pen Syrtqy ister mınıstrliginiń jaýapty hatshysy Anarbek Qarashevtyń qatysýymen ótken brıfıngte keńinen aıtyldy.  Departament dırektory 2012 jyly jaýapty hatshy men memlekettik organ basshysynyń arasyndaǵy ókilettikter naqty ajyratylǵandyǵyn tilge tıek ete kelip, bul rette jaýap­ty hatshynyń mindetine appa­rattyń kásibı jumysy jáne ony uıymdastyrý kirip otyr­ǵandyǵyn atady. Búgin­gi tańda jaýapty hatshy memleket­tik organnyń jumysyn uıym­das­tyrýshy fýnksııalar – býhgalterııa, kadr saıasaty, zańgerlik qyzmet jáne ózge de mindetterdi atqarady. Endigi qadam ákimshilik qyzmettiń avtonomdyǵyn qamtamasyz etý úshin, eń aldymen, jaýapty hatshynyń mártebesin arttyrý. Mınıstrler saıası tulǵa retinde vedomstvonyń sol jáne ózge de salalaryndaǵy strate­gııalyq maqsattaryn aıqyn­daýmen aınalysady jáne joǵa­ry zań shyǵarýshy organmen zańshyǵarmashylyq salasynda ózara yqpaldasatyn bolady. Al jaýapty hatshynyń mindetine ákimshilik basqarý jáne saıası qyzmetker qabyldaǵan sheshim­der­di júzege asyrý jatady. Bul rette saıası tulǵanyń aýy­sýy jaýapty hatshynyń aýysýy­na alyp kelmeıdi. Osylaısha, memlekettik fýnk­sııalardyń sabaqtastyǵy men turaq­tyly­ǵyna qol jetkizil­mek. Mun­daı jaǵdaı kásibı appa­rattyń qalyptasýyna ózin­dik sebin tıgizedi. Memle­kettik apparattyń kásibıligin qamta­masyz etý úshin 2016 jyly barlyq ákimshilik qyz­metker­lerdi keshendi attestattaýdan ótkizý kózdelip otyr. Bul jerde qyzmetkerdiń zańdardy bilýi ǵana emes, sonymen qatar, olardyń óz qyzmettik mindet­terin atqarýǵa qajetti jeke jáne laýa­zymdyq sapalary da jan-jaqty saralanady. Ol úshin testileý, áńgimelesý jáne attesta­sııalyq tapsyrmalar arqyly anyq­taý qaras­tyrylyp otyr. Onyń nátı­jesi qyzmetshini damytý­dyń josparyna negiz bolyp qalanýy tıis. Departament dırektory, sondaı-aq, attestattaýdyń maq­saty memlekettik qyzmetshi­ni jumystan alastatý emes,  olardyń áleýetterin anyqtaý bolaryna nazar aýdartty. Onyń aıtýynsha, attestasııalyq komıssııa memlekettik qyzmet­shiniń qabiletine qaraı laýazy­myn joǵarylatý týraly usy­nys engizýi de múmkin. Munyń barlyǵy qazirgi tańda Memlekettik qyzmet isteri jáne sybaılas jemqorlyqqa qarsy is-qımyl agenttigi tarapynan ázirlenip jatqan normatıvtik-quqyqtyq bazada bekitiledi. Sondyqtan da, «Memlekettik qyzmet týraly» jáne oǵan ilespe túzetýlerimen jańa zań jobasy ázirlenip jatqany aıtyldy. Syrtqy ister mınıstrliginiń jaýapty hatshysy Anarbek Qarashev dıplomatııalyq qyz­mettiń mán-jaıyna toqtaldy. Ol 2002 jyly qabyldanǵan «Dıplomatııalyq qyzmet týraly» Zańǵa tıisti ózgerister engizilgendigin ataı kelip, qazir dıplomattar osy zańdyq qujat boıynsha jumystaryn atqaryp jatqandyǵyna nazar aýdartty. Otandyq dıplomattar Qazaqstannyń álemniń damyǵan 30 eliniń qataryna enýi baǵytynda jumys istep jatqandaryn jetkizgen ol 2017-2018 jyldary Qazaqstan Respýblıkasy BUU Qaýipsizdik Keńesiniń turaqty emes múshesi bolýǵa umtylyp otyrǵanyn ortaǵa saldy. Qazirgi kezde Qazaqstannyń 64 memlekette óz ókildigi bar. Mınıstrlik qatary «Bolashaq» baǵdarlamasy boıynsha álemniń eń ozyq degen 200 joǵary oqý oryndaryn bitirip kelgen bilikti kadrlarmen tolyǵýda eken. Jalpy, jaýapty hatshynyń sózinen belgili bolǵandaı, Syrtqy ister mınıstrliginde búginde 1233 adam jumys istese, sonyń 846-sy shetelderdegi ókildikterde óz mindetterin atqarýda. Jáne de ortalyq apparatta 387 adam eńbek etýde. Qoldanystaǵy zań boıynsha dıplomatııalyq qyzmetker sol jáne ózge shet memlekette úsh jyl qyzmet atqarýy tıis bolsa, elshi nemese mınıstrdiń usynysymen onyń qyzmeti taǵy bir jylǵa sozylýy múmkin. Asqar TURAPBAIULY, «Egemen Qazaqstan».