Sý resýrstary jáne ırrıgasııa mınıstri Nurjan Nurjigitov Jambyl oblysyndaǵy sý sharýashylyǵy ınfraqurylymyn damytý jobalarynyń júzege asyrylý barysymen tanysyp, jergilikti turǵyndarmen kezdesti, dep habarlaıdy Egemen.kz.
Moıynqum aýdanynda mınıstr Fýrmanov gıdrotorabyndaǵy jóndeý jumystarymen tanysty. Shý ózeninde ornalasqan bul nysan Túrkistan oblysynyń Sozaq aýdanyna ekologııalyq maqsatta sý jiberýge arnalǵan. Byltyr gıdrotorapta segmentti qaqpa aýystyrylǵan. Atalǵan aýdannyń Qarabóget aýylynda N.Nurjigitov eldimekenge aparatyn kireberis avtojoldaǵy kópirdiń qurylys barysyn tekserdi. Uzyndyǵy 78,3 metrdi quraıtyn bul nysan Shý ózeniniń arnasy arqyly qaýipsiz ári jyldam qatynasty qamtamasyz etýge múmkindik beredi. Sondaı-aq mınıstr uzyndyǵy 120 shaqyrym, eni 30-40 metr bolatyn Fýrmanov aınalma kanalynda 40 jylda alǵash ret júrgizilgen mehanıkalyq tazalaý jumystarynyń nátıjelerimen tanysty. Bul jumystar bıyl shilde aıynda bastalyp, 25 jeltoqsanda aıaqtaldy. Tazalaý jumystaryna 9 shynjyrtabandy ekskavator jáne 2 tıegish tehnıka jumyldyryldy. Mehanıkalyq tazalaý Qylyshbaı, Qumózek, Qarabóget, Saryózek atty tórt eldi mekenniń boıymen ótetin kanaldyń sý ótkizý qýatyn arttyrýǵa múmkindik beredi. Nátıjesinde Túrkistan oblysynyń Sozaq aýdanyna sý jiberý tıimdiligi artady. Eske salaıyq, ótken vegetasııaaralyq kezeńde ekologııalyq maqsatta Sozaq aýdanyna Shý ózeninen 1,5 mlrd tekshe metr sý jiberilgen. Qazirgi ýaqytta Moıynqum aýdanynda Shý ózeninde retteýshi gıdrotehnıkalyq qurylys salý jáne ózen túbin tazalaý jobasy ázirlenip jatyr.
Shý aýdanynda mınıstr ırrıgasııa jáne drenaj júıelerin jetildirý jobasynyń ekinshi kezeńi sheńberinde atqarylǵan jumystardyń nátıjelerimen tanysty. Bıyl jalpy uzyndyǵy 69,7 shaqyrymdy quraıtyn 15 kanaldy rekonstrýksııalaý jumystary aıaqtalyp, olardyń boıyna 240 gıdrotehnıkalyq qurylys ornatyldy. Sonymen qatar 55 baqylaý uńǵymasy burǵylandy. Qazirgi ýaqytta nysandardy paıdalanýǵa berý jumystary júrgizilip jatyr.
«Kelesi jylǵa jasalǵan boljamdardy eskere otyryp, oblystaǵy sý sharýashylyǵy nysandarynyń barynsha daıyndyǵy men tıimdi jumys isteýin qamtamasyz etý qajet. Qazirgi jaǵdaıda sýarý maqsatynda bolsyn nemese tabıǵatty qorǵaý úshin júrgiziletin sý jiberýler bolsyn, sýdy dál ári ádil bólý burynǵydan da mańyzdy bolyp otyr. Sondyqtan júrgizilip jatqan barlyq qurylys-montajdaý jáne tazalaý jumysyn ýaqytyly aıaqtaý qajet», dedi N.Nurjigitov.