Jambyl oblysynda jumysshy mamandyqtar jylynyń jabylý saltanaty ótti. Is-sharaǵa óńir basshysy Erbol Qarashókeev qatysty, dep habarlaıdy Egemen.kz.
«Eńbegim – elime: adal eńbek, aıqyn maqsat» taqyrybynda ótken forýmda ataýly jylda atqarylǵan aýqymdy jumys jan-jaqty saralanyp, úzdikter marapattaldy.
- Jumysshy mamandyqtar jyly aıaqtalǵanymen, eńbek adamyna degen qurmet tolastamaıdy. Bilikti maman, otanshyl azamattar qaı kezde de elimiz úshin kerek. Sondyqtan bul baǵyttaǵy jumys aldaǵy ýaqytta jalǵasa beredi, dedi oblys basshysy E. Qarashókeev forýmnyń ashylý saltanatynda sóılegen sózinde.
Ataýly jyl aıasynda óńirde birqatar mańyzdy jumys atqaryldy. Atap aıtqanda, jergilikti bıýdjetten 223 mln teńge bólinip, 6 salalyq hab ashyldy. «Knauf» JShS, «Alına» JShS, «Meragro» JShS esebinen 4 kolledjge jalpy quny 46 mln teńgeniń zamanaýı qural-jabdyqtary alyndy. Sondaı-aq óńirdegi kolledjder, joǵary oqý oryndary men kásiporyndar arasynda 116 yntymaqtastyq týraly memorandýmǵa qol qoıyldy. Bul túlekterdiń jumyspen qamtylý múmkindikterin arttyryp, mamandyqtar boıynsha oqý baǵdarlamalaryn jańartýǵa múmkindik berdi.
Búginde oblys halqynyń sany 1 mln 200 myńnan asady. Sonyń ishinde 357 myńnan astamy – jastar. Iаǵnı, jastar óńir turǵyndarynyń 29,2 paıyzyn quraıdy. Bıyl 24 myńnan astam jas jumyspen qamtylyp, jańa mamandyqtardy meńgerdi.
Jumysshy mamandyqtar jyly aıasynda óńirde 4 halyqaralyq, 2 respýblıkalyq jáne 11 oblystyq deńgeıdegi túrli is-shara uıymdastyryldy.
Forým sońy marapattaý rásimine ulasty. Basqosýda «Eń úzdik jumys berýshiler» baıqaýy aıasynda «Innovasııa men tehnologııadaǵy úzdik seriktestik», «Úzdik strategııalyq seriktestik», «Úzdik áleýmettik seriktestik», «Stýdentterdi qoldaýdaǵy úzdik seriktestik» nomınasııalary boıynsha jeńimpazdar marapattaldy.
Taraz