Ár tasyna ulttyq rýhtyń ısi sińgen Ulytaýda alǵadaı jastardyń «Otanshyl-2015» bilim berý lageri osymen besinshi ret qazyq qaǵyp, jalaý kóterdi. Sońǵy jyldary aýqymdy jobaǵa aınalǵan bul sharaǵa oblystyń Qaraǵandy, Jezqazǵan, Sátbaev, Temirtaý, Shahtınsk, Saran, Prıozersk qalalary men Ulytaý, Abaı, Shet, Osakarov, Buqar jyraý, Jańaarqa aýdandarynan delegat jastar kelip bas qosty.
Jalpy, «Otanshyl» jobasynyń aıasynda jastar qoǵamdyq qyzmettiń tájirıbesin zerttep, buqaralyq sharalardy uıymdastyrý men ótkizýdi, sonymen qatar, ár saladaǵy ózindik jobalaryn qorǵap jáne olardy usyna bilýdi oqyp-úırenedi. Budan bólek, eldiń erteńi sanatyndaǵy urpaqtyń ókilderi lager negizindegi alańqaıda ózderiniń daryny men qabiletterin kórsetip qana qoımaı, pikirles jańa dostarmen tanysyp, sony bastamalaryna qajetti qoldaý tabýǵa mol múmkindik alady.
«Otanshyl-2015» jastar lageriniń saltanatty ashylýynda Sátbaev qalasynyń ákimi Ánýar Omar, L.N.Gýmılev atyndaǵy EUÝ janyndaǵy «Jastar» ǵylymı-zertteý ortalyǵynyń dırektory Janar Býkanova jáne Qaraǵandy oblystyq jastar bastamashyldyǵy ortalyǵynyń dırektory Aqjol Qurmanseıitov sóz sóılep, qoǵamdyq ómirdiń jýan ortasynda júrgen jalyndy jastarǵa sáttilik tiledi.
Delegattar atynan sóz alǵan Temirtaý qalasyndaǵy jastarmen jumys jónindegi ortalyqtyń dırektory Aınagúl Ábdirahmanova jastarǵa kórsetilgen qoldaý – eldiń bolashaq damýyna salynǵan ınvestısııa ekenin atap ótti. «Otanshyl-2015» lageriniń ashylýyna kelgen qonaqtar «Sátbaev-2020: jastarǵa jaqyn qala» dep atalǵan ǵylymı-praktıkalyq konferensııaǵa qatysty. Jıyn qorytyndysy boıynsha Sátbaev qalalyq ákimdigi, L.N.Gýmılev atyndaǵy EUÝ janyndaǵy «Jastar» ǵylymı-zertteý ortalyǵy, Qazaqstan Jastar kongresi jáne Qaraǵandy oblystyq jastar bastamashyldyǵy ortalyǵy arasynda tórtjaqty memorandýmǵa qol qoıyldy.
«Otanshyl-2015» lageriniń ekinshi jumys kúninde «О́ńirdegi memlekettik jastar saıasatynyń damýy» taqyrybynda synaq alańqaıynyń otyrysy ótti. Bul sharaǵa Sátbaev ákimdiginiń memlekettik qyzmetkerleri qatysty. О́z kezeginde «Jastar» ǵylymı-zertteý ortalyǵynyń qyzmetkerleri forým delegattary úshin ár taqyrypty qaýzaǵan sheberlik synyptaryn uıymdastyrdy. Lagerdiń úshinshi kúni jas delegattar qasıetti Ulytaý taýlaryna ekskýrsııa jasap, kıeli mekenniń tamyljyǵan tabıǵatymen tanysty. Sonymen qatar, bilim berý lageri qyzmetiniń aıasynda ǵylym, tehnıka, bilim, mádenıet jáne ónerge qatysty kórmeler men jármeńkeler, jobalar tusaýkeserleri uıymdastyryldy.
Bul basqosýǵa qatysqan jastardyń bári de biraýyzdan mundaı júzdesýlerdiń tájirıbe almasýǵa, ózekti máseleler tóńiregindegi alýan túrli pikirlerdi tyńdaýǵa, kókeıkesti taqyryptardy talqylap, oı-pikir jarystyrýǵa tamasha múmkindikter beretinin erekshe atady. Ulytaýda uıymdastyrylǵan «Otanshyl-2015» jastar lageriniń balaýsa býyndy keleshektegi ónimdi jumystarǵa yntalandyryp qana qoımaı, oblystaǵy jastar uıymdarynyń arasyndaǵy baılanystyń nyǵaıýyna da ıgi yqpalyn tıgizeri anyq.
Qaırat ÁBILDINOV,
«Egemen Qazaqstan».
Qaraǵandy oblysy.