Alamanda alǵan júlde – qomaqty

Qysqy sporttaǵy jeńis

Jyl basynda Qytaıdyń Harbın qala­synda qysqy Azııa oıyndary jalaýyn jelbiretti. Jarysqa 32 Azııa elinen 1000-nan astam sportshy qatysty. 7 aqpanda túńligi túrilgen aq alaman 14 aqpanda máresine jetti. El senimin arqalap barǵan 137 sportshymyz 4 altyn, 9 kúmis, 7 qola medal oljalady. Bıatlon, kerlıng, skı-alpınızm, hokkeı, short-trek, konkımen júgirý, shańǵy jarysy, frıstaıl-akrobatıka, taý shańǵysy saıysy, mánerlep syrǵanaý syndy sport túrlerinen baq synady. Tek jeti sport túrinen ǵana medal buıyrǵan qyz-jigitter jalpy esepte tórtinshi satyny mise tutty.

Qytaı sportshylary 32 altyn, 27 kúmis, 26 qola medal ıelenip kósh bastasa, 16 altyn, 15 kúmis, 14 qola júlde alǵan Oń­tústik Koreıa sportshylary ekinshi satyǵa turaqtady. Úshtikti 10 altyn, 12 kúmis, 15 qola júlde buıyrǵan Japonııa sportshylary túıindedi.

Harbındegi dúbirli dodada Ánurany­myzdy aldymen short-trekten erler komandasy shyrqatty. 5000 metrge estafetalyq saıysta Ádil Ǵalıahmetov, Aıbek Násen, Abzal Ájǵalıev, Gleb Ivchenko, Denıs Nıkısha, Mersaıd Jaqsybaev qara úzip, el mereıin asyrdy. Frıstaıl-akrobatıka tartysynda Sherzod Hashırbaev pen Roman Ivanov sınhrondy sekirý synynda úzdik nátıje tirkep, qysqy Azııa oıyndarynyń chempıony atandy. Qanjyǵamyzǵa úshinshi altyn medaldy bıatlonnan Vladıslav Kıreev bókterip berdi. Ol 10 shaqyrym qashyqtyqqa sprınttik jarysta úzdik shyqty. Hokkeıden erler quramasy irikteý kezeńderindegi qarsylastaryn aıqyn jeńip, fınaldyq aıqasta Japonııa quramasyn 5:0 esebimen eńserip, mártebemizdi asyrdy.

Harbınde ótken aq Azıadanyń kúmis medalin short-trekten Olga Tıhonova, Iаna Han, Denıs Nıkısha, Ádil Ǵalıahmetov enshiledi. Sańlaqtar 2000 metrge aralas estafetada kúmis júldeni qanaǵat tutty. Konkımen 100 metrge júgirýde Evgenıı Koshkınge de kúmis medal buıyrdy. Short-trekten Iаna Han, Olga Tıhonova, Malıka Ermek, Zeınep Qumarqan, Alına Ájǵalıeva, Madına Janbosynova bastaǵan áıelder quramasy 3000 metrge estafetalyq jarysta kúmispen kúpteldi. Frıstaıl-akrobatıkadan Aıana Joldas, Sherzod Hashırbaev, Asylhan Asan aralas komandalar tartysynda kúmis medal enshiledi. Bıatlonnan Vadım Kýrales 10 shaqyrymdyq sprıntte kúmisti mise tutty. Shańǵy jarysynan elimizdiń áıelder quramasy (Ksenııa Shalygına, Kamıla Elǵazınova, Angelına Shýryga, Nadejda Stepashkına) 4×5 shaqyrymdyq estafetada kúmis medal ıelendi. Bıatlonnan erler quramasy 4×7,5 shaqyrymdyq estafetada kúmis medaldy qanaǵat tutty. Aleksandr Mýhın, Áset Dúısenov, Kırıll Baýer, Vladıslav Kıreev bastaǵan jigitter altynǵa synyq súıem jetpedi. Hokkeıden áıelder quramasy Ońtústik Koreıany 3:0 esebimen eńserip, kúmis medaldy ıelendi.

Qysqy Azııa oıyndarynyń qola júl­desin frıstaıl-akrobatıkadan Aıana Joldas ıelendi. Qazaq sportyndaǵy sańlaqtardyń izin basqan jas talant jahandyq dodadaǵy alǵashqy medalin ıelendi. Sınhrondy sekirýde Ardana Mahanova men Aıana Jol­das­tyń ónerin qazylar qola júldege laıyq dep baǵalady.

Konkımen júgirýde Krıstına Sılaeva, Darıa Vajenına, Nadejda Morozova komandalyq sprıntte qola medal oljalady. Shańǵy jarysynda Oljas Klımınge 10 shaqyrym qashyqtyqqa erkin stılde júgirýde qola medal buıyrdy. Erler estafetasynda Konstantın Borsov, Naıl Bashmakov, Oljas Klımın, Vladıslav Kovalev 4×7,5 shaqyrymdyq tartysta qola medal aldy. Bıatlonnan áıelder quramasy 4×6 shaqyrymdyq estafetada qola medal enshiledi. Komanda sapyndaǵy Darıa Klımına, Arına Krıýkova, Olga Poltoranına, Elızaveta Beleskaıa baryn salǵanymen altynǵa qol jetkize almady.

Mánerlep syrǵanaý synynda Mıhaıl Shaıdorov 246,01 upaı jınap, qola medal oljalady. Jalpy, Mıhaıl bıyl basqa da birqatar bedeldi saıysta top jardy. Ol Ońtústik Koreıa elinde ótken Tórt qurlyq chempıonatynda úzdik shyqty. Odan keıin AQSh-tyń Boston qalasynda ótken álem chempıonatynda kúmis medal oljalap, kelesi jyly ótetin qysqy Olımpıadanyń lısenzııasyna ıe boldy.

Qysqy Azııa oıyndarynda sport­shylarymyzdyń jalpy esepte tórtinshi satyǵa turaqtaýy táýir-aq nátıje. Dese de keı sport túrlerinen sańlaqtar jankúıer kútken mejeden kórine almady.

Boksshylar – jyldyń úzdigi

Bıyl júlde jaý­dyrǵan boksshylarymyz boldy. Astanada «World Boxing» uıymy álem kýboginiń kezeńin ótkizdi. 30-dan astam elden 300-ge tarta boksshy jınalyp, elorda tórin dúbirge bóledi. Elimizdiń boksshylary bul synda 8 altyn, 4 kúmis, 4 qola medal enshiledi.

Osy uıym qońyr kúzdiń basynda An­glııanyń Lıverpýl qalasynda álem chem­pıonatynyń otyn mazdatty. Bizdiń qyz-jigitter jalpy esepte kósh bastap, qazaq boksynyń mereıin asyrdy. Alýa Balqybekova, Aıda Ábikeeva, Natalıa Bogdanova, Sanjar Táshkenbaı, Mahmud Sabyrhan, Tórehan Sabyrhan, Aıbek Oralbaı álem chempıony atandy. Parıj jazǵy Olımpıadasynyń qola júldegeri Nazym Qyzaıbaı Lıverpýldegi álem chempıonatynyń fınalynda súrinip, kúmis medaldy mise tutty. Vıktorııa Grafeeva men Eldana Tálipova qola júlde ıelendi.

Bıyl bokstan álem chempıonaty eki ret ótti. Halyqaralyq boks federasııa­sy (IBA) kóktemde Serbııanyń Nısh qala­synda bokstan áıelder arasyndaǵy álem chempıonatynyń jalaýyn jelbiretti. Eldos Saıdalın baptap barǵan burymdy boksshylarymyz bul alamannan 3 altyn, 2 kúmis, 1 qola enshilep qaıtty.

IBA erler arasyndaǵy álem birin­shiligin qarasha aıynda birikken Arab Ámirlikteriniń Dýbaı qalasynda ótkizdi. Jigitterimiz 3 altyn, 1 kúmis, 2 qola medalmen oraldy.

Boksshylarymyz Azııa chempıonatynan da orasan oljamen oraldy. 19 jasqa deıingi jastar arasyndaǵy qurlyq dodasyn Taıland eli uıymdastyryp, Bang­koktan jigitter 2 altyn, 5 kúmis, 6 qola medal enshiledi. Al 15 jasqa deıin­gi jasóspirimderdiń Azııa chempıonaty Iordanııanyń Amman qalasynda ótip, qazaq boksynyń izbasarlary 6 altyn, 13 kúmis, 4 qola medal ıelendi. 17 jasqa deıingi boksshylardyń qurlyq dodasy da Ammanda uıymdastyryldy. Jalyndy jastarymyz 10 altyn, 2 kúmis, 9 qola medal oljalady. Buǵan qosa Bahreınde ótken jasóspirimder arasyndaǵy III jazǵy Azııa oıyndarynan boksshylar 5 altyn, 3 kúmis, 2 qola medalmen oraldy.

Qazaq boksynyń tarıhynda eki dúr­kin álem chempıony atanǵan sportshylar saýsaqpen sanarlyq qana edi. Naq­ty aıtqanda, Serik Sápıev pen Nazym Qyzaıbaıdyń enshisinde eki dúrkin álem chempıony ataǵy bar edi. Sol mejege bıyl Alýa Balqybekova, Aıda Ábikeeva, Sanjar Táshkenbaı, Mahmud Sabyrhan, Sáken Bıbosynov at baılap, eki dúrkin álem chempıony atandy.

Týrızm jáne sport mınıstrligi Jylan jylyn qorytyndylap, «Úzdik – 2025» syı­lyǵyn sańlaqtarǵa tabystaǵanda elimiz­diń boks federasııasy úzdik ujym dep tanyldy.

Islam yntymaqtastyǵy oıynyndaǵy oljamyz

Saýd Arabııasynyń Er-Rııad qalasynda ótken VI Islam yntymaqtastyǵy oıyndaryna qatysqan 97 sportshy 56 medal enshiledi. Jarystarda 57 eldiń sportshylary baq synady. Bizdiń sańlaqtar 16 sport túrinen saıysqa tústi. Atap aıtqanda jeńil atletıka, kıbersport, semserlesý, gandbol, djıý-djıtsý, dzıýdo, karate, júzý, ústel tennısi, taekvondo, aýyr atletıka, erkin kúres, grek-rım kúresi, áıelder kúresi, ýshý, mýaı-taı syndy sport túrlerinen júldege talasty. Enshimizge 15 altyn, 20 kúmis, 21 qola medal buıyrdy.

Sportshylarymyz buǵan deıin de Islam yntymaqtastyǵy oıyndaryna qaty­syp, báıgeli bolǵan. Degenmen bıylǵy dodanyń dárejesi ózgeshe. О́ıtkeni keıbir sport túrinen alǵash ret altyn medal buıyrdy. Máselen, dzıýdo kúresinen Arýna Jangeldına alǵashqy altyndy tartý etse, ústel tennısinen Kırıll Gerasımenko jekeleı saıysta, erler komandasy toptyq tartysta chempıon atandy. Mýaı-taı sportynan Turar Dúısehannyń, semserlesýden erler komandasynyń altyny da alǵashqy oljamyz. Sonymen qatar djıý-djıtsý saıy­synda otandastarymyz úsh altyn ıelendi. Er-Rııadtaǵy dúbirli dodada gandbol, ýshý syndy sport túrlerinen de birinshi ret medal buıyrdy.

Tuńǵysh álem chempıony

Bıyl taekvondorshylar eńkeıgen eńsesin tiktedi. Eresekter arasyndaǵy álem chempıony qytaıdyń Ýsı qalasynda ótti. Nodıra Ahmedova men Aıdana Qumartaeva qola júlde ıelenip, tarıhı nátıjeni jań­ǵyrtty. Qyzdarymyz eresekter ara­syndaǵy álem chempıonatynyń júldesin sońǵy ret 2007 jyly ıelengen edi. Arada 18 jyl aýnaǵanda jahandyq dodanyń medali buıyrdy.

Jeńisti sapardy jastarymyz jalǵady. Kenııa eli uıymdastyrǵan jastar arasyn­daǵy álem chempıonatynda Beıbarys Qablan (87 kg) men Batyrhan Tóleýǵalı (87 kg) top jardy. Tamerlan Tileýles (63 kg) qola júlde enshiledi. Taekvondodan ulttyq qurama úzdikteri ózge de halyqaralyq saıys­tarda olja saldy.

Halyqaralyq saıystar – shyńdalý mektebi

2025 jyly elimizde iri halyqaralyq sporttyq jarystar da joǵary deńgeıde uıymdastyryldy. Bokstan, sondaı-aq frıs­taıldan álem kýbogi kezeńderi ótse, dzıýdodan «Grand Slam» týrnıri jalaýyn jelbiretti. Budan ózge birqatar olımpıadalyq sport túrlerinen halyqaralyq jarystar ótti. Astanada alǵash ret Azııa Paralım­pııa­lyq komıtetiniń konferensııasy men Bas assambleıasy uıymdastyrylyp, elimiz­diń Azııadaǵy ınklıýzıvti sport ortalyq­tarynyń biri retindegi mártebesin nyǵaıta tústi.

Almatynyń «Qaırat» fýtbol klýby ÝEFA Chempıondar lıgasynyń negizgi kezeńine shyǵyp, álemdegi tegeýrindi fýtbol klýbtarymen tartysqa tústi.

Dzıýdo kúresinen bıylǵy álem chempıonaty Majarstannyń Býdapesht qalasynda ótti. О́kinishke qaraı erler kórsete almaǵan qaısarlyqty áıelder básekesinde Ábıba Ábýjaqynova (48 kg) tanytty. Buǵan deıin jahandyq dodanyń eki dúrkin qola júldegeri atanǵan arý bul joly fınalǵa deıin barlyq qarsylasyn qoǵadaı japyrdy. Qazaq sportynyń tarıhynda dzıýdo kúresinen álem chempıonatynyń fınalyna shyqqan alǵashqy qazaq qyzy tarıhı nátıjege qol sozym qalǵanda súrinip, kúmisti mise tutty. Osy sport túrinen jas­tar arasyndaǵy álem chempıony Perýde ótip, Dana Ábdirova da kúmis medal ıelendi.

Short-trekten Qytaıdyń Beıjiń qala­synda ótken álem chempıonatynda Denıs Nıkısha 500 metrde kúmis júlde oljalady. Ol byltyrǵy álem chempıonatynda da kúmispen kúptelgen bolatyn.

Sadaq atýdan elimizdiń ulttyq quramasy álem chempıonatynan qola medalmen oraldy. Vıktorııa Lıan, Adel Jeksenbınova, Roksana Iýnýsova bloktyq sadaq atýdan komandalyq tartysta júlde ıelendi. Bul sport túrinen bizge álemdik alamannyń me­dali 1997 jyldan beri buıyrmaı kelgen edi.

Kúres túrlerinen de tarıhı nátıje tirkelgen jyl boldy. Grek-rım kúresinen Aıdos Sultanǵalı (60 kg) Horvatııanyń Zagreb qalasynda Kók týymyzdy jel­biretip, Ánuranymyzdy shyrqatty. 1999 jyldan beri ýysymyzǵa túspeı kelgen altyn medal buıyrdy. Erkin kúresten eresekterdiń álemdik dodasynda Asyljan Esengeldi (61 kg), byltyr álem chempıony atanǵan Nurqoja Qaıpanov (74 kg), Rızabek Aıtmuhan (97 kg) qola medaldy qanaǵat tutty. Jastar arasyndaǵy álem chempıonatynda Edige Qasymbek alyptar arasynda top jarsa, qyzdar básekesinde Shuǵyla О́mirbek chempıon atandy.

Semserlesý saıysynan álem chempıonatynda erler quramasy alǵash ret júldege qol jetkizdi. Komandalyq tartysta Rýslan Kýrbanov, Vadım Sharlaımov, Elmır Álimjanov, Kırıll Prohodov qola medal ıelendi.

Álemdik reıtıngide kóshbastaýshylar qatarynda turǵan Elena Rybakına Saýd Arabııasynyń Er-Rııad qalasynda ótken WTA qorytyndy týrnırinde jeńimpaz atandy. Fınaldyq tartysta bizdiń tennıs­shi álemniń birinshi raketkasy Arına Sobolenkony eki sette utty. E.Rybakına el sportynyń tarıhynda bul týrnırdiń alǵashqy jeńimpazy atandy.

Kórkem gımnastıkadan Aqmaral Ereke­shova jastar arasyndaǵy álem chempıo­­natynan 2 altyn, 1 kúmis medal enshiledi. Buǵan deıin de bul saıysta bizge álem birinshiliginiń júldesi buıyrmaı kelgen edi.

Nysana kózdeýden Mysyrdyń Kaır qalasynda ótken álem chempıonatynda 50 metr qashyqtyqtan úsh qalyptan atý saıysynda Aleksandra Le, Arına Malınovskaıa, Elızaveta Bezrýkova úshtigi qola medal ıelendi. Erler arasynda 25 metrden tapanshamen atýda Nıkıta Chırıýkın, Kırıll Fedkın, Artem Kabakov qola júlde oljalady.

Rekordty tirkegen Sýrdlımpıada

Qarasha aıynda Japonııanyń Tokıo qalasynda XXV jazǵy Sýrdlımpıada oıyndary ótti. Elimizden barǵan sportshylar 8 altyn, 4 kúmis, 13 qola medal jeńip alyp, 81 eldiń arasynda jalpy esepte 9-satyǵa turaqtady. Estý qabiletine zaqym kelgen sportshylardyń tórt jylda bir aınalyp soǵatyn tartysynda qyz-jigitter buryn-sońdy buıyrmaǵan orasan tabysqa keneldi. Saıysqa qosylǵan 78 sporty sporttyń segiz túrinen synǵa túsip, abyroıymyzdy asyrdy. Ásirese sýrdo dzıýdodan beldesýge shyqqan balýandar joǵary jetistikke qol jetkizip, 5 altyn, 2 kúmis, 4 qola medal ıelendi. Erkin kúresten 1 altyn, 1 kúmis, 3 qola, grek-rım kúresinen 1 altyn, 1 kúmis, 1 qola medal buıyrdy.

Jeńil atletıkadan 1 altyn, 1 qola, taek­vondo saıysynan 3 qola júlde enshimizge jazyldy. Ústel tennısinen erler quramasy komandalyq synda qola medal oljalady. Buǵan deıin Sýrdlımpıada oıyndarynan mundaı nátıje buıyrmaǵan edi. Sańlaqtarymyz el sportynyń deńgeıin pash ete bildi.

Biz saıypqyran sańlaqtarymyzdyń qadaý-qadaý jetistikterine ǵana toqtaldyq. Keler jyl da dúbirli dodalarǵa toly bolmaq. El abyroıyn asqaqtatar sport­shylarǵa sáttilik serik bolsyn deımiz.