Jyljymaly úı daýy

nemese 142 mıllıon teńgeniń jyry Almaty qalasyndaǵy «KEREGE HOMES» JShS elimizdegi zamanaýı óndiris salasyn eńsergen sanaýly kompanııalardyń biri. 2012 jyldan beri san qyrly ári kóship-qonýǵa qolaıly jyljymaly turǵyn úıler, ónerkásiptik tońazytqyshtar men avtokólik borttary, t.b jasaýmen aınalysady. Alaıda, naryqta joly bolyp, básekelesterin basyp ozǵan «KEREGE HOMES» kompanııasy sońǵy ýaqytta sot tabaldyryǵyn tozdyryp júrgen jaıy bar. «Ádildik izdep keldim» degen N.Qusaıynǵazyuly sóziniń rastyǵyna kóz jetkizýimiz úshin tıisti qujattardy qarap shy­ǵýy­myzdy ótindi. Biz óz kezegin­de kompanııa basshysy izgen ádil­diktiń astaryna úńilip, qat-qat qujat­tardy aqtarǵannan keıin anyq­taǵanymyzdy qalyń oqyrmannyń nazaryna usynyp otyrmyz. Sóz kezegin aldymen N.Qusa­ıynǵazyulynyń ózine bersek: – «2013 jyldyń qazan aıynda «О́zenmunaıgaz» AQ elektrondy ashyq tender ótkizedi. Tenderge túsken dúnıe munaı salasyna qajetti jyljymaly úıler. Osy tenderge Aqtaý qalasyndaǵy «VIKr plıýs» JShS-i qatysyp, utady. Biraq, bul kompanııanyń mundaı mobıldi jyljymaly úılerdi jasaýǵa lısenzııasy da tájirıbesi de joq. Soǵan qara­mastan, olar jyljymaly úılerdi jobalaý, jasaý, jetkizý boıynsha «О́zenmunaıgaz» AQ jarııalaǵan tenderde jeńiske jetedi. Bul kompanııa tenderge deıin bizge habarlasyp, joǵarydaǵy tenderge qatysatyny jaıly, jeńiske jetken jaǵdaıda bizdiń kompanııanyń kómegine júginetindikteri týraly aıtyp, tipti, aldyn-ala ke­lisimshartqa da otyrǵan bolatyn­byz. Osylaısha, «VIKr plıýs» tenderdi utysymen birden Almatyǵa bizge keldi. Olardyń usynystaryn qarap, 23.10.2013 jyly «VIKr plıýspen» ortaq kelisimshartqa otyrdyq. Kelisimshart boıynsha «О́zenmunaıgaz» AQ-tyń tapsyrysyn oryndaýdy jartylaı biz moınymyzǵa alyp, «VIKr plıýs» bizdiń jumysymyzǵa № VIKr 15-11/13-1 kelisimsharty boıynsha 29 mıllıon 450 myń teńge, № VIKr 21-10/13-1 kelisim­shartyna saı 62 mıllıon 309 myń 980 teńge, № VIKr 21-10/13-2 keli­simsharty boıynsha 63 mıllıon 240 myń teńge tóleýge min­detteme aldy. Men basqaratyn «KEREGE HOMES» JShS birden iske kirisip, atalǵan tapsyrysty mejelengen ýaqytta tolyqtaı aıaqtap, 31.01.2014 jyly ótkizip berý-qabyldap alý aktisi jáne oryndalǵan jumys aktisimen taýar­lardy «VIKr plıýske» ótkiz­dik. Osylaısha, olar bizge kelisim­shartta kórsetilgen talapqa saı banktik bes kúnniń ishinde atqarylǵan jumysymyzdyń 90 paıyz aqysyn esepshotymyzǵa aýda­­rýy tıis edi. Alaıda, sol qara­jatty «VIKr plıýs» kúni búginge deıin tólemeı, bizdi zańǵa júginýge májbúr etýde. Kompanııamyzdyń kásibi osy keleńsiz jaǵdaıdan keıin keri ketip, shyǵynǵa batýda. «VIKr plıýstiń» «aqsha áli túsken joq» degen syltaýy bit­pegen soń, 2014 jyly 20 sáýirde «О́zenmunaıgaz» AQ-tyń býhgal­terııasyna ózimiz qońyraý shal­dyq. Olar bizge eń sońǵy aqshany «VIKr plıýstiń» esep shotyna 4 sáýirde aýdarǵandaryn, «VIKr plıýspen» tolyqtaı esep aıyrysqandyqtaryn aıtty. Sodan keıin, biz Aqtaýǵa «VIKr plıýske» bardyq. Sol ýaqytta olar bizden qabyldap alynǵan zattardyń barlyǵyn «О́zenmunaıǵa» ótki­zip, tıisti aqshalaryn 100 paıyz alǵany da rastaldy. Biz jasa­ǵan sol zattar qazirgi tańda «О́zen­munaıgaz» AQ-tyń balansynda tur. Paıdaǵa asyp ta jatyr. Arnaıy birneshe ret baryp óz kózimmen kórdim. Jaltyraǵan jaıly baspanalarda munaıshylar eshqandaı shaǵymy joq turyp jatyr. Biraq, soǵan qaramastan, «VIKr plıýs» taýarlardyń usaq-túıek aqaýlary bar degendi jeleý etip, bizge tıesili aqshany bermeýde. Negizi mundaı shaǵymdy bizge «О́zenmunaıgaz» aıtýy kerek edi. «О́zenmunaıgaz» bizdiń jasaǵan taýarlarymyzdyń sapasyna kóńili tolmaı, «VIKr plıýske» qaıtaryp jatsa bir jón...» dep máseleni kompanııa basshysy osylaı baıandady. N.Qusaıynǵazyulynyń shaǵy­myn tyńdap, dybys taspaǵa basyp alǵan soń, atalǵan daýǵa qatysty barlyq qujattar men sot sheshimderin qarap shyqtyq. Árıne, sot sheshimine shúbá keltirýden aýlaqpyz. Desek te, bir is boıynsha bir sottyń eki túrli sheshim shyǵarýy bul daýdyń qanshalyqty shytyrman ekenin ańǵartqandaı. Anyǵynda, bul daýda «О́zen­munaıgaz» tapsyrys berýshi bi­rin­shi tarap bolsa, al, «VIKr plıýs» tapsyrysty oryndaýshy ekin­shi tarap. Alaıda, «VIKr plıýs» óziniń tenderde jeńiske jet­kenin paıdalanyp, úshinshi tarap «KEREGE HOMES» JShS pen kelisimshartqa otyrýy jaǵdaıdyń shıelenisýine sebep bolǵandaı. Bálkim, «VIKr plıýs» «KEREGE HOMES» kompanııasymen aradaǵy iskerlik qatynasqa syzat túsirmeı, kelisimsharttyń barlyq talaptaryn buljytpaı oryndaǵanda ortaq istiń aqyry úsh tarapqa tek paıda ákeler me edi? Desek te, ázirge bastapqy eki taraptyń esebi túgel, alaıda, «mindetimizdi minsiz oryndadyq» degen «KEREGE HOMES» JShS-tiń shash-etekten zııan shegýi qanshalyqty ádil? Joǵaryda atalǵan kelisim­shart­ty qolymyzǵa alyp, muqııat oqyp ta shyqtyq. Onda «VIKr plıýs» dırektory R.Kryjanıýk satyp alýshy, «KEREGE HOMES» dırektory N.Qusaıynǵazyuly jetkizýshi retinde qoldaryn qoıyp, mórlerin basqan. Qabyldap alý-ótkizý aktisi men oryndalǵan jumys aktisinde de dál osy  eki basshynyń qoldary men mórleri saırap tur. Bul qujat «О́zenmunaıgazdyń» tapsyrysy boıynsha jasalǵan jyljymaly úılerdi qabyldap alý-ótkizý kezinde eshqandaı zańbuzýshylyq oryn almaǵandyǵynyń birden-bir aıǵaǵy dese de bolady. Kelisimshart boıynsha barlyq talaptardy oryndaǵanyn kóldeneń tartqan aryz ıesi, «VIKr plıýs» kelisimsharttyń 4.2.3 bóligin óreskel buzǵanyn aıtady. Keli­simsharttyń osy bóliginde jet­kizilgen ónimniń 90 paıyz qunyn ónimdi qabyldap alý-berý aktisine eki taraptyń basshylary qoldaryn qoıyp, mórlerin basqan ýaqyttan bastap, banktik bes kúnniń ishinde satyp alýshy jetkizýshige tóleýi tıis ekendigi taıǵa tańba basylǵandaı jazylǵan. Olaı bolsa, «VIKr plıýstiń» kelisimsharttyń negizgi talabyn bes kún túgil, bir jarym jyldan keıin de oryndamaýyna ne sebep? Bul saýalymyzǵa biz jaýapty Mańǵystaý oblystyq aýdanaralyq mamandandyrylǵan sottyń sheshiminen izdedik. Áýeli, «VIKr plıýs» «KEREGE HOMES» JShS-inen qabyldap alynǵan sapasyz taýarlardy basqasyna aýystyrý týraly atalǵan oblystyq sotqa talap aryz túsiredi. 2014 jyly 16 mamyrda Mańǵystaý oblys­tyq aýdanaralyq mamandandyryl­ǵan soty azamattyq is qozǵap, 09.06.2014 jyly «VIKr plıýstiń» talap aryzy negizinde keshendi sot-qu­rylys saraptamasyn taǵaıyn­daýǵa uıǵarym shyǵarady. Ádi­let mınıstrligi sot saraptama orta­lyǵy Mańǵystaý oblystyq SSI-nyń 04.09.2014 jylǵy №1082 saraptaý qorytyndysy boıynsha daýly taýarlardyń «sapasy talapqa saı emes» dep tanylady. Alaıda, atalǵan sot saraptamasyn muqııat qaraý barysynda, birqatar túsiniksiz derekterdi kózimiz shaldy. Birinshiden, saraptaý barysynda mamandar «VIKr plıýs» pen «KEREGE HOMES» arasyndaǵy kelisimsharttarda kórsetilgen talaptarǵa emes, «KEREGE HOMES» jarnamalyq býkletterine kóbirek kóńil ból­genge uqsaıdy. Tipti, taraptar arasyn­daǵy zańdyq qujattardyń birde-birinde aty atalmaǵan qara­paıym býklettiń saraptamaǵa qan­daı qatysy baryn bile almadyq. Ekinshiden, 27.08.2014 jyly sarapshy mamandardyń qatysýymen ótken zertteýge «VIKr plıýstiń» ǵana arnaıy ókili qatysyp, al, «KEREGE HOMES» pen «О́zen­­munaıgazdan» eshkimniń qatys­paǵany qalaı? Atalǵan saraptamany bas­shy­lyqqa alǵan oblystyq sot «Vıkr plıýstiń» paıdasyna sheshim shyǵarady. Buǵan narazy bolǵan «KEREGE HOMES» qarap qalmaı, Almaty qalalyq mamandandyrylǵan aýdanaralyq sotqa talap aryz túsiredi. Daýdyń budan ári qalaı órbigenin N. Qusaıynǵazyuly jalǵasa, «2014 jyldyń 9 maý­symynda Almaty qalalyq aýda­naralyq mamandandyrylǵan ekonomıkalyq sotqa berdik. Is tórt aıǵa jýyq qaralyp, 22 tamyzda bizdiń paıdamyzǵa sot sheshimi shyqty. Alaıda, sot sheshimimen kelispegen «VIKr plıýs» apellıa­sııaǵa berdi. Apellıasııada is eki aıǵa jýyq qaralyp, dál sot sheshimi shyǵatyn kúni «VIKr plıýs» nege ekeni belgisiz aıaqasty shaǵym­daryn apellıasııalyq satydan aryzyn keri qaıtaryp aldy. Biraq, apellıasııalyq sot Almaty mamandandyrylǵan ekonomıka­lyq sottyń sheshimin kúshinde qal­dyrdy. Sóıtip, apellıasııalyq sot­tyń sheshimi oryndaýǵa ketken edi, alaıda, «VIKr plıýs» kassa­sııa­lyq sotqa júgindi. О́z kezeginde, kassa­sııalyq sot Almaty qala­lyq maman­dandyrylǵan ekono­mıka­lyq sottyń sheshimin qaıta qaraýǵa jiberdi. Sonymen ne kerek, Almaty qalalyq maman­dan­dyrylǵan ekonomıkalyq sottyń sýdıasy G.Meırjanova isti qaıta qarap, 2015 jyldyń 13 mamy­rynda sheshim shyǵardy. G.Meır­janovanyń sheshimi boıyn­sha bizdiń talap aryzymyz qana­ǵattan­dyrýsyz qaldyryldy. Sebebin túsin­bedik. Zań boıynsha suraý salyp edik, sýdıa G.Meırjanova jazbasha túsinikteme berýden bas tartty» dedi. Sot óndirisine túsken talap aryzda «VIKr plıýstiń» «KEREGE HOMES» JShS-ne bere­shegi 123 mıllıon bolsa, ósim pul 15 mıllıon 500 myń, memle­ket­tik baj sa­lyǵy 4 mıllıon 155 myń teńge  eken. Mıl­lıonda­ǵan teńgege qatysty daý­dyń esebi men máseleniń aq-qara­syn quzyrly organdar anyq­taı jatar. Al, biz daýly iske qatys­ty qujattardy aqtarý barysynda «VIKr plıýs» tender arqyly qol jetkizgen qyrýar qarjyny alýǵa qanshalyqty eńbek sińirdi jáne «KEREGE HOMES» JShS-ine tıesili mıllıondar qazir qaıda?» degen suraqqa jaýap izdegen edik. P.S. Taǵy da, qujattardy aqtarý barysynda «VIKr plıýstiń» banktegi qarjylyq operasııalary jaıly anyqtama qolymyzǵa tústi. Árıne, mıllıondaǵan qarjy aınalymynyń esebine jetý múmkin emes shyǵar. Alaıda, jyljymaly úıdi jasaýshylarǵa tólenýi tıis mıllıondar «VIKr plıýstiń», enshiles kompanııalary «Aqtaý grodstroı», «Kaspı transkom», «Krjanok V.I», «Kryjanok R.V», «Abylkaıyrv K», t.b esep-shotyna aýdarylypty. Sondaı-aq, «VIKr plıýs» pen «KEREGE HOMES» arasyndaǵy kelisimsharttar Reseı «Jınaq banki» enshiles bankine kezinde kepilge qoıylyp, «VIKr plıýs» nesıe rásimdegen eken. Kamıla YSQAQOVA, jýrnalıst. ALMATY.