Búgin Memleket basshysynyń «Túrkistan» gazetine bergen keń kólemdi suhbaty jarııalandy. Suhbat barysynda Prezıdentke «Ekonomıkalyq reformalar taýarlardyń baǵasy men qyzmetterdiń tarıfine salmaq salady. Jurt buǵan alańdap otyr. Siz Úkimetke osy máseleni sheshýge arnalǵan naqty sharalar josparyn ázirleýdi tapsyrdyńyz. Bul jumys reformanyń sapasy men qarqynyna áser etpeı me? Azamattarymyz ál-aýqatymyzdy jaqsartady dep kútip júrgen reformanyń nátıjesin joqqa shyǵarmaı ma?» degen suraq qoıylǵan edi, dep jazady Egemen.kz.
Saýalǵa jaýap bergen Memleket basshysy qalaıda reformalardy júzege asyrý qajettigin aıtty.
«Álemdik tájirıbege qarasaq, reformalar qolǵa alynǵan kezde jurtshylyq ony kóp jaǵdaıda túsinbeı, qabyldamaı jatady. Ondaı kezde barlyq jaýapkershilikti arqalaı alatyn kóshbasshynyń róli aıryqsha. Men Memleket basshysy retinde osyndaı jaýapkershilikti óz moınyma alamyn. Bolashaqta da buǵan daıynmyn. Menimen birge jumys istep jatqan azamattar muny jaqsy biledi. Árıne, bul kedergisi kóp, qıyn jol ekenin túsinemin. Tarıhta reformatorlardan góri basqynshylar men popýlısterdiń aty kóbirek qalyp jatady. Biraq, Qazaqstan úshin basqa jol joq. Biz bir jerde toqtap qalmaı, alǵa qaraı nyq qadam basý úshin reformalardy qalaıda júzege asyrýymyz kerek», dedi Prezıdent.
Qasym-Jomart Toqaevtyń aıtýynsha, qarjy resýrstary memleketke qajetti jobalarǵa ǵana jumsalýǵa tıis.
«Azamattarymyzǵa zııany tımeýi úshin qys mezgilinde tarıfterdi ósirý ákimshilik tásilder arqyly ýaqytsha toqtatyldy. Sonymen birge, Úkimetke bıýdjet qarjysyn barynsha tıimdi paıdalaný mindeti júkteldi. Ekonomıkaǵa aqshany orynsyz quıa berýge bolmaıdy, bul ınflıasııany kúsheıtip jiberedi. Qatań bıýdjettik tártip kerek. Qarjy resýrstary memleketke qajetti jobalarǵa ǵana jumsalýǵa tıis. Byltyr qarasha aıynda Úkimet, Ulttyq bank, Qarjy naryǵyn retteý jáne damytý agenttigi birlesip, úsh jyldyq baǵdarlama qabyldady. Qujat azamattardyń ál-aýqatyn jaqsartý úshin ınflıasııany tómendetýge arnalǵan», dedi Memleket basshysy.
Prezıdent ekonomıkalyq teńsizdikter áli de saqtalyp otyrǵanyn aıtty.
«Halyqaralyq sarapshylar Qazaqstannyń «ortasha tabystar qaqpanyna» túsip qalǵanyn durys baıqap otyr. Ashyǵyn aıtaıyn, bul – ekonomıka týraly oqýlyqtan alynǵan jalpylama uǵym emes, kún saıyn kóptegen azamatymyzdyń basynan ótip jatqan ómir shyndyǵy. Jurt tabys taýyp jatyr, tipti, jaqsy tabys tabatyndar da bar. Biraq, onyń bárin ınflıasııa jep qoıady nemese ıpoteka tóleý, balalardy oqytý, ata-anaǵa kómektesý sııaqty kúndelikti tirlikke jumsalyp, joq bolyp ketedi. Aýyryp qalý nemese jumystan aıyrylý sekildi kez kelgen kóldeneń kedergi turmystaǵy turaqtylyqty buzyp jiberýi múmkin. Men kezinde baspana alý, balalardyń oqý aqysyn tóleý, emdelý úshin zeınetaqy jınaǵyn paıdalanýǵa ruqsat berý týraly sheshim qabyldadym. Kóbisi solaı jasady, bul sheshimge rızashylyqtaryn da bildirip jatty. Biraq, ádettegideı, stomatologııa qyzmetin kórsetemiz degen jeleýmen zeınetaqy qorynan 200 mıllıard teńgeden astam qarjy jymqyrǵan alaıaqtar da tabyldy. Quqyq qorǵaý organdary qazir bul máselemen aınalysyp jatyr. Osy medısınalyq qyzmet túrine zeınetaqy jınaǵyn paıdalanýǵa tyıym salýǵa týra keldi. Biraq, basqa da qıturqy tásilder paıda boldy, tipti, plastıkalyq otaǵa tólem jasaıtyndar bar. Al, bıznes ókilderine keler bolsaq, olar jumys oryndaryn ashyp, salyqtaryn adal tóleıdi. Alaıda, nesıe ósiminiń joǵary bolýy, aınalymdaǵy qarajattyń azdyǵy olardyń keń aýqymda damýyna, jańa naryqtarǵa shyǵýyna, zamanaýı tehnologııalardy engizýine múmkindik bermeı tur. Ekonomıkanyń qurylymy ózgerip jatyr. Degenmen, menińshe, ózgeris qarqyny baıaý. Halyqaralyq qarjy ınstıtýttary men reıtıng agenttikteriniń baǵalaýynsha, elimizdi baqýatty, tipti, baı memleket dep ataýǵa bolady. Bul sózdiń jany bar. Soǵan qaramastan, ekonomıkamyzda teńsizdikter áli de saqtalyp otyr. Onyń bárin shuǵyl rettep, túzý jolǵa salýymyz kerek. Biz bul jaǵdaıdy bilemiz, ony jurttan jasyratyn oıymyz joq. Mundaı qıyndyqty kóptegen memleket basynan ótkerip jatyr. Biz «ósim aýrýy» máselesin mindetti túrde sheshemiz. Naqty josparymyz bar», dedi Memleket basshysy.