Ústine bir shelek sý quısań da qurǵaq shyǵatyn ataqty Ostap Benderdiń aǵaıyndary Shymkentte boı kórsete bastady. Olar áldebir tutynýshylar odaǵynyń atyn jamylǵan qoǵamdyq birlestikterdiń kýáligin jan qaltalaryna salyp alǵan. Ańdıtyndary – shaǵyn kásibi bar kásipkerler. Baspalap keledi. О́ktem sóıleıdi. Kelisimshartqa turyp aqsha tóleýdi talap etedi.
Basynan bastaıyqshy. Ońtústik Qazaqstan oblysynyń kásipkerler palatasyna Shymkenttiń turǵyny, shaǵyn kásipker Aınur Besbaeva óz basynan ótken ahýaldy aıtyp shaǵynady. Shaǵyn dúkeni bar. Bireýden ilgeri, bireýden keıin ómir súrip, taǵdyryna shúkirshilik aıtyp júrgen.
Bir kúni dúkenine syp etip alty birdeı áıel, erkegi aralas top kirip keledi. Tutynýshylardyń quqyǵyn qorǵaý ornynanbyz dep sendiredi. Kýálikterin kórsetedi. «Quqyǵyńdy qorǵaımyz, memlekettik organdar arasyndaǵy týyndaǵan problemalardy yń-shyńsyz sheship beremiz», deıdi. Bylaı aıtqanda, tóbesinen sý ótpeıtin berik shatyr.
Aınur senedi. Kelisimshartqa otyrady. Suraǵan aqshasynyń jartysyn sol jerde qolma-qol sanap beredi. Keıinirek tekserýshiler kele bastaǵanda álgi «kryshalaryna» telefon shalmaı ma?! Telefondary óshirýli, jumys ornynyń telefony da únsiz.
Arada biraz ýaqyt ótken soń erli-zaıypty quqyq qorǵaýshylar kelgen. Kelisimshartqa otyryp, aqshasyn tólese sanıtarlyq-epıdemıologııalyq stansa, salyq organdary sııaqty qazynalyq organdarda týyndaǵan máseleni sheship beredi eken. Alǵashqydan aýzy kúıgen Aınur Besbaeva úmittendirmeı shyǵaryp salady.
Úshinshisi bul joqta dúkenge kelipti. Satýshy qyzdar abyrjyp álgini telefonǵa qosady. Shańqyldap turyp urysypty Aınurǵa. «Eger menimen jumys jasamaıtyn bolsań, tuqymyńdy tuzdaı qurtamyn, memlekettik organdardan tekserý uıymdastyryp, dúkenińdi japtyramyn».
Aınur qýlyqqa basyp: «Tura turyńyz, qazir sizben sóılesetin jaýapty organnyń adamy barady», degen eken, álgi jer tepsinip turǵan dereý taıyp turypty.
Oblystyń kásipkerler palatasynda ótkizilgen baspasóz máslıhatynda departamenttiń ákimshilik kedergilerdi azaıtý bóliminiń jetekshisi Tımýr Naqypbekov Aınur aıtqan problemanyń jalǵyz oqıǵa emestigin jetkizdi. Mysyqtabandaǵan quqyq qorǵaýshylar zańgerleri bar úlken bıznes ortalyqtaryna barmaıdy eken. Olardyń ańdyǵany beınekamerasy joq shaǵyn dúken, shaǵyn dárihana, jol boıyndaǵy býdka-dúken. Sýyt kiredi, buıyrǵanyn alyp taıyp turady.
Kásipkerler palatasyna Kentaý qalasynan onshaqty shaǵyn kásipkerler qol qoıǵan aryz túsken. Tutynýshylar odaǵynanbyz dep kúshenip kelgender dúken sórelerin aralap, taýarlardyń saqtaý merzimin teksergen. Sońy: «Biz turǵanda eshkim betińe jel bolyp tımeıdi, kelisimshartqa otyryp aqsha tólep tursań bolǵany», degen ýáj.
Osyndaı oqıǵalar Saıram, Báıdibek aýdandarynyń shaǵyn kásipkerlerinde de kezdesipti. Tımýr Naqypbekov jýrnalıst aǵaıyndardan kómek surady. Ár aýdan, qalada prokýratýranyń janynda kásipkerlik palatasymen birlesken jedel top bar. Qońyraý túsken mezette alaıaqtardy tuıaq serpýge murshasyn keltirmeı ustaıdy. Ázirge olar aman júr. Ońtústikte bireýdiń bıznesi ústinen jonyp jeý oqıǵalary osylaısha kóbeıip tur.
Baqtııar TAIJAN,
«Egemen Qazaqstan».
ShYMKENT.