Almatynyń «Taýgúl» shaǵyn aýdanynda turatyn Pansatbek qajy Raıymbek aqsaqaldyń baqshasynda alma gúldedi...
Kóktemde gúl ashqan jazdyq alma jemisin salyp, ony áýlet adamdary jep taýysqan sátte alma aǵashynyń qaıtadan gúldegeni, tipti, kópshilik úshin kútpegen oqıǵa boldy.
– Mundaı baqshadaǵy qubylysty óz basym birinshi ret kezdestirip otyrǵanym joq, – deıdi 83 jastaǵy qart. – Ilgerirekte, budan 10-15 jyl buryn da bir alma aǵashy bir jylda eki ret gúldegeni bar. Biraq, jemis bermegen edi.
Almatyda kúnniń qyzýy shildeniń basyndaǵydaı áli de qaıtar emes. Oqta-tekte quıyndatyp mezgilsiz jel soqqany bolmasa, qalanyń baıaǵy...jaýyp, basylyp turatyn aq jaýyny joq. Jerge tamshy túspegeli de aıǵa jýyqtap qaldy.
Kúnniń erekshe ystyǵy qarııanyń baý-baqshasyna osyndaı bir qyzyq qubylys syılady. Tóbesinen ystyq, tabanynan sý ketpegen alma aǵashy osylaısha qaıtalaı búr jarǵan sekildi.
– Jazdyń sońǵy aıynyń alǵashqy onkúndiginde qaıta gúldegen jemis aǵashy kúzdik tuqymdarymen qatarlasyp jemis te berip qalýy múmkin, – deıdi aqsaqal.
Rasynda da, búginde aýa raıy da, tabıǵat ta oqystan qubylyp qoıatyndy shyǵardy. Sondyqtan da adamdar úshin eshnárse de tańsyq bolmaı barady. Onyń birden-bir kýási Pansatbek atanyń baqshasyndaǵy alma aǵashtyń bir jazda ekinshi qaıtara gúldegeni...
Talǵat SÚIINBAI,
«Egemen Qazaqstan».
ALMATY.
Sýrette: zeınetker Pansatbek qarııa baqshasynda.