AQSh Senaty prezıdent Donald Tramptyń ókilettigin shekteý baǵytynda qadam jasap, eki partııa ókilderi qoldaǵan rezolıýsııany qabyldady. Bul qujat Kongrestiń aldyn ala kelisiminsiz Venesýelanyń «ishinde nemese oǵan qarsy» áskerı kúsh qoldanýǵa tyıym salady. Zań jobasyn 52 senator qoldap, 47 senator qarsy daýys berdi, dep habarlaıdy Egemen.kz.
Daýys berý Tramptyń Venesýelaǵa qarsy yqtımal «ekinshi tolqyn» shabýyldary týraly sońǵy qoqan-loqqylaryna jaýap retinde ótti. Buǵan deıin ol Venesýela prezıdenti Nıkolas Madýrony tutqyndaý jáne ekstradısııalaý maqsatynda áskerı operasııa júrgizý týraly buıryq bergen. Rezolıýsııany barlyq 47 demokratpen birge 5 respýblıkashyl senator qoldady.
Zań jobasynyń bastamashysy – Vırdjınııa shtatynan saılanǵan demokrat senator Tım Keın. Ol «Tramptyń soǵysy aıqyn zańsyz, óıtkeni bul áskerı operasııa Kongrestiń ruqsatynsyz buıyrylǵan» dep málimdedi. Senator áriptesterin batyldyq tanytyp, saılaýshylardyń múddesin qorǵaýǵa shaqyryp, áskerı is-qımyldar bastalmas buryn Kongreste talqylaý men daýys berýdiń mańyzyn atap ótti.
AQSh Kongresi Venesýelaǵa qatysty áreketi úshin Trampty aıyptady
Endi zań jobasy kelesi aptada Senatta taǵy bir daýys berýden ótip, keıin О́kilder palatasynyń maquldaýyn alyp, prezıdenttiń qol qoıýyna usynylýy tıis. Osyǵan baılanysty onyń túpkilikti qabyldaný yqtımaldyǵy tómen. Degenmen bul qujat Trampqa syrtqy saıasat máselelerinde Kongrestiń pikirin eskerý qajettigi jóninde mańyzdy belgi beredi.
О́z kezeginde Donald Tramp rezolıýsııany qoldaǵan respýblıkashyldardy qatań synǵa alyp, olardyń áreketin «aqymaqtyq» dep atady jáne bul qadam prezıdenttiń bas qolbasshy retindegi ókilettigin shekteýge baǵyttalǵanyn aıtty. Sondaı-aq ol mundaı daýys berý AQSh-tyń ulttyq qaýipsizdigine qater tóndiredi dep esepteıdi.
Kentýkkı shtatynan respýblıkashyl senator Rend Pol zań jobasyn qoldap, Kongrestiń keıbir músheleri soǵys bastaý jaýapkershiligin prezıdenttiń moınyna júktegisi keledi dep málimdedi.
«Basqa bir eldiń bas shaharyn bombalaý jáne onyń basshysyn qulatý – bul soǵys áreketi», dedi ol.
Phenıan AQSh-tyń Venesýeladaǵy áreketinen seskene me?