ASTANA. 12 tamyz. Qyzylorda oblysyndaǵy Aral aýdany «Araltuz» aksıonerlik qoǵamyna Parlament Májilisiniń depýtattary jumys saparymen bardy. Bul týraly oblys ákimdiginiń baspasóz qyzmeti habarlady.
Depýtattar as tuzyn shyǵaratyn zaýyttyń jumys barysymen tanysty. Onda atqarylyp jatqan aýqymdy sharýalarǵa qanyǵyp, jumysshylarmen kezdesti.
Aksıonerlik qoǵam respýblıkadaǵy tuz qazý men ony óńdeý boıynsha eń iri kásiporyn bolyp tabylady. Zaýyt jyl boıy, úzdiksiz jumys isteıdi. Mundaǵy tuz qazý, ony óńdeý, qaltalaý, tasymaldaý jumystaryn kásiporyn qyzmetkerleri jumyla atqarady. Depýtattar tuz shyǵaratyn óndiris ornynyń barlyq bólimin aralap, jumysshylarmen ózara áńgimelesti.
«Araltuz» kompanııasynyń prezıdenti Aıdynbek Taýasarov meımandardy zaýyttyń tynys-tirshiligimen tanystyra otyryp, aldaǵy ýaqytta kombınat janynan bir seh ashýdy josparlap otyrǵanyn aıtty. Ol úshin arnaıy qurylǵylar da ákelinip qoıǵan. Osy jyly lentasyn qııýdy mejelegen jańa sehtyń jumysy órge bassa, 200 qyzmetkerge arnalǵan jumys orny ashylady dep kútilýde.
Parlament Májilisiniń depýtattary Quttyqoja Ydyrysov pen Baqytbek Smaǵul osydan birneshe jyl burynǵy óndiris oshaǵynda qazirmen salystyrǵanda úlken ózgeris bar ekendigin, qaıta jańǵyrtylǵannan keıin tuzdyń sapasy aıtarlyqtaı artqandyǵyn aıtyp, óndiris jumysyna oń baǵalaryn berdi.
Talǵat Raıymbek.
Derek, sýret: Qyzylorda oblysy ákimdiginiń baspasóz qyzmeti.