ASTANA. 12 tamyz. О́tken túnde Grýzııanyń astanasy – Tbılısı qalasynda fýtboldan ÝEFA Sýperkýbogy úshin oıyn oınaldy. Bul synda Ispanııanyń eki birdeı komandasy «Barselona» men «Sevılıa» synǵa tústi. Asa tartysty ótken kezdesýde katalonııalyqtar 5:4 esebimen jeńip, klýb tarıhynda besinshi márte ÝEFA Sýperkýbogyn ıemdendi. Bul týraly egemen.kz habarlady.
Matchtaǵy alǵashqy gol bar bolǵany 3-mınýtta tirkeldi. Onyń avtory «Sevılıa» oıynshysy Ever Banega. Biraq sevılıalyqtardyń bul basymdyqty 4-aq mınýt ustap turýǵa shamalary jetti. Iаǵnı, 7-mınýtta «Barselona» shabýylshysy Lıonel Messı mergendigimen kózge tústi. Al 16-mınýta ol dýbldiń avtory atandy. Úziliske bir mınýt ýaqyt qalǵan kezde Katalonııadan kelgen komanda esepti óz paıdalaryna 3:1-ge jetkizdi. Bul joly dop Rafınıanyń atyna jazyldy.
Ekinshi taım «Barselonanyń» esepti eseleýimen bastaldy. 52-mınýtta Lýıs Sýarestiń tepken doby qarsylastarynyń qaqpasynan tabyldy. Osydan keıin ǵana «Sevılıa» júıeli oıyn órnegin kórsetip, jınaqylyq tanytty. Nátıjesinde 81-mınýtqa deıin úsh gol soǵyp, tarazy basyn teńestirdi. Atap aıtqanda, Antonıo Reıes (57-mınýt), Kevın Gameıro (72-mınýt, penaltı) jáne Evgenıı Konoplıanka (81-mınýt) komandasyna úmit syılap, jankúıerlerin qýanyshqa bóledi.
Osylaısha, negizgi ýaqyt 4:4 esebimen teń aıaqtaldy. 15 mınýttan turatyn qosymsha eki taımnyń alǵashqysynda esep ózgergen joq. Al kezdesýdiń aıaqtalýyna 5 mınýt qalǵan kezde, ıaǵnı 115-mınýtta barselonalyq Pedro nátıjeli soqqy jasap, jeńis golynyń avtory atandy. Soǵan sáıkes, Tbılısıdegi oıyn 5:4 esebimen «Barselonanyń» paıdasyna sheshildi.
Atalǵan komanda úshin bul – besinshi ÝEFA Sýperkýbogy. Mundaı kórsetkish boıynsha «Barselona» osy saıysta eń kóp jeńiske jetken Italııanyń «Mılan» komandasymen teńesti. Alǵash ret bul kýbokty 1992 jyly ıemdengen katalonııalyqtardyń 1997, 2009 jáne 2011 jyldary da mereıleri ústem boldy.
Elaman Qońyr.
Derek: egemen.kz.
Sýret: uefa.com.