QARAǴANDY. 12 mamyr. Qaraǵandyda 6 mamyrdan beri joq bolyp ketken qyzdy bólshektep óltirgen jigit quqyq qorǵaý organdary qyzmetkerlerine oqıǵanyń jaı-japsaryn aıtyp berdi. Bul týraly oblystyq ishki ister departamenti baspasóz qyzmetiniń deregine silteme jasaǵan egemen.kz tilshisi habarlady.
«25 jastaǵy qaraǵandylyq qyzdy qatygezdikpen óltirgen jigit oqıǵanyń jaı-japsaryn aıtty», - delingen habarlamada.
Aıta keteıik, Qaraǵandy qalasynda turatyn Aıaýly Súleımenova 6 mamyr kúni aıaq astynan joq bolyp ketedi. Budan kipi alǵan týystary áleýmettik jeli arqyly jurtqa habar berip, Aıaýlyny izdestirýge kómek suraıdy.
Joǵalǵan qyzdyń habary tek úsh kúnnen keıin ǵana shyǵady. Jurt Jeńis kúni meıramyn toılap jatqan kezde qyzdyń júk shabadanǵa bólshektelip salynǵan máıiti jergilikti mekteptiń aýmaǵyndaǵy qudyqtan tabylady.
Qaraǵandy qalalyq ishki ister departamenti baspasóz qyzmetiniń habarlaýynsha, sol 9 mamyr kúni Súleımenovany óltirgen degen kúdikpen Osakar aýdanynyń 20 jasar turǵyny Erjan Tyraev ustalady. Ol HQO qyzmetkeri Aıaýly Súleımenovanyń 3 bólmeli páterindegi bir bólmeni jalǵa alyp turǵan. Teksere kelgende, jigittiń kolledj oqýshysy ekeni de belgili boldy. Jýyrda ol Molodejnoe eldi mekenine óndiristik tájirıbeden ótýge jiberilgen eken .
Úı ıesimen janjal týatyn 6 mamyr kúni ErjanTyraev Aıaýlyǵa bólmeni jalǵa alyp turǵany úshin 3 myń teńgeni berip, búkil mamyr boıy Molodejnoeda bolatynyn aıtyp, jalǵa alý aqysyn tolyq 1 aıǵa tólemeıtinin aıtqan. Osynyń saldarynan úı ıesi men jigittiń arasynda urys týady. Sonyń barysynda stýdent úı ıesiniń basyna 2 ret soqqy beredi.
Soqqy qatty tıgen Aıaýly jerge qulap túsip, birden baqılyqqa attanyp ketedi. Muny baıqaǵan Erjan Tyraev qyzdyń óli denesinen qutylmaqshy bolǵan. Ol Súleımenovanyń máıitin bólshektep, shabadanyna salyp, tysqa alyp shyǵady. Biraq ony alysqa aparmaı, sol mańdaǵy 16 mekteptiń janyndaǵy jylý qubyrynyń qudyǵyna tastaı salady. Al qyzdyń týystary onyń máıitin tapqan kezde ErjanTyraev jalǵan oqıǵany qıystyryp, biraz ótirik aıtady. Stýdent Aıaýlyǵa er kisiniń kelip, onyń ekeýin ońashada qaldyrýyn suraǵanyn, al artynsha úıge oralǵan kezde onda eshkimniń bolmaǵanyn baıandaıdy.
Biraq isti júrgizýshi tergeýshiler bul aqparattyń oıdan shyǵarylǵandyǵyn birden baıqaǵan.
Qazir Erjan Tyraevqa qarsy qylmystyq is qozǵaldy.
Aıqyn Nesipbaı.
Derek: egemen.kz.
Sýret: Novyı vestnık.