Senat tóraǵasynyń orynbasary Jaqyp Asanov Konstıtýsııalyq reforma jónindegi komıssııanyń alǵashqy otyrysynda jeke derekterdi qorǵaý máselesine erekshe toqtaldy. Onyń aıtýynsha, búgingi sıfrlyq álemde azamattardyń quqyǵy qaǵaz júzinde ǵana emes, naqty ári tıimdi qorǵalýy tıis, dep habarlaıdy Egemen.kz.
J.Asanov atap ótkendeı, «kóshe qylmysy» sońǵy 10 jylda toǵyz ese tómendegenimen, múlikti tonaý sıfrlyq keńistikke kóshken. Sóz basyn ol mysal retinde jýyrda Aqmola oblysynda bolǵan oqıǵadan bastady.
«О́mirden bir keıs. Jýyrda Aqmola oblysynda 25 adamnan turatyn uıymdasqan qylmystyq top ustaldy. Sonda ne istedi? 348 azamattyń jeke derekterin urlap, solardyń atynan 4 mlrd teńgedeı kredıt aldy. Sóıtip sonshama adam bankke barmaı, esh qujatqa qol qoımaı, oılamaǵan jerde qarjylyq tuzaqqa túsip, qaryzǵa batty... Biz shynaıy ómirmen qatar sıfrlyq álemde de kún saıyn ómir súrip júrmiz. Biraq sol ómirde qandaı qaýipter bar – sony bile bermeımiz», dedi Konstıtýsııalyq reforma jónindegi komıssııanyń múshesi Jaqyp Asanov.
Spıker sıfrlyq dáýirde jeke ómirdi qorǵaý burynǵydaı qaǵazdaǵy qujattar men kóshedegi qaýipsizdikpen shektelmeıtinin aıtty. Smartfon men ınternetke táýeldi ómirimizde azamattardyń derekteri alaıaqtardyń qolyna túsip, zańsyz áreketterdiń nysanyna aınalyp otyr. Konstıtýsııalyq kepildik tek qaǵazda qalmaýy tıis – ol sıfrlyq keńistikte de tolyq saqtalýy qajet. Memleket úshin bul – halyqqa degen senimdi saqtaý jáne shynaıy qaýipsizdikti qamtamasyz etý mindeti.
«Osy tusta zańdy suraq týady: azamattarymyzdyń quqyǵyn sıfrlyq álemde qalaı qorǵaımyz? Internettegi qylmyskerlerden qalaı saqtanamyz? Konstıtýsııada jeke ómirge qol suqpaý týraly 18-shi bap bar. Biraq ol qabyldanǵan kezde sıfrlyq álem qazirgideı damymaǵantyn. Internette búgingideı ómir súrgen joqpyz. Tek shynaıy álemde júrip jattyq. Qujattarymyz da, aqshamyz da qaǵaz túrinde qaltamyzda júretin. Al búgin ómirimizdiń biraz bóligin jelide ótkizemiz. Telefon degen ómirimizdiń ajyramas bóligine aınaldy. Biraq dál osy keńistikte biz qatty osalmyz. Úıde de, kóshede de júrgende zań qorǵasa, al smartfonda ondaı deńgeıdegi qorǵanys joq. Jeke derek qoldan qolǵa ótip, azamat alaıaqtyń jemi bolyp jatqanyn kúnde kóremiz. Ár adam qaıda júrse de – kóshe bolsyn, ınternet bolsyn, óziniń qorǵalǵanyn sezinýi tıis. Bul memlekettiń týra mindeti», dedi Senat Tóraǵasynyń orynbasary Jaqyp Asanov.
Asanov sóz sońynda Konstıtýsııalyq reforma aıasynda jeke derekterdi qorǵaýdy arnaıy qarastyrý qajettigin atap, bul halyqtyń memleketke degen senimine tikeleı áser etetinin jetkizdi.