«Nur Otan» partııasy fraksııasynyń jetekshisi Darıǵa Nazarbaevanyń tóraıymdyq etýimen fraksııanyń jınalysy ótti, dep habarlady Májilistiń baspasóz qyzmeti.
Onda «2015-2017 jyldarǵa arnalǵan respýblıkalyq bıýdjet týraly» Zańǵa ózgerister men tolyqtyrýlar engizý týraly» Qazaqstan Respýblıkasy Zańynyń jobasy qaraldy.
Jınalystyń jumysyna Qazaqstan halqy Assambleıasynan saılanǵan Májilis depýtattary, Prezıdent Ákimshiliginiń jáne Úkimettiń ókilderi qatysty.
Fraksııa jetekshisi D.Nazarbaeva «Ekonomıkalyq pragmatızm jáne áleýmettik jaýapkershilik bıýdjet týraly zań jobasynyń negizine alynǵanyn» atap kórsetti.
Zań jobasy boıynsha Parlament Májilisi Qarjy jáne bıýdjet komıtetiniń hatshysy Tatıana Iаkovleva, Ekonomıkalyq reforma jáne óńirlik damý komıtetiniń tóraǵasy Seıitsultan Áıimbetov, Agrarlyq máseleler komıtetiniń hatshysy Tólegen Ibraev, Qazaqstan halqy Assambleıasynan saılanǵan depýtat Egor Kappel sóz sóılep, Elbasynyń tapsyrmalaryna sáıkes jalaqy, zeınetaqy, járdemaqy jáne basqa da áleýmettik tólemder mólsheri bekitilgen deńgeıde saqtalatynyn málimdedi.
Jınalys qorytyndysy boıynsha Úkimettiń bıýdjet týraly zań jobasyn qoldaý jóninde sheshim qabyldandy.