Qalalyq perınataldyq ortalyqta bıylǵy jyldyń 21 shildesinde tórtinshi ret úshem, 5 tamyzda tuńǵysh ret jaryq dúnıe esigin ashqan tórtem ata-analarynyń kóz qýanyshyna aınaldy. Búginde sábılerdiń densaýlyǵy jaqsy.
Bir aıta keterligi, jaqsylyq habarǵa shólirkep júrgen Almatydaǵy barlyq BAQ ókilderi bul joly taıly-taıaǵymen qalmaı kelipti. Bir-birlerin quttyqtap, perzenthana qyzmetkerlerine baýy berik bolsyn aıtyp jatyr. Osy qýanyshtyń ústine Almaty qalasy ákiminiń orynbasary, ortalyqty birneshe jyl basqarǵan, myńdaǵan balanyń kindik sheshesi, altyn qoldy hırýrg Záýresh Amanjolova men Almaty qalalyq densaýlyq saqtaý basqarmasynyń basshysy Janat Qasymjanova da qosylyp, tórtem jáne úshemdi dúnıege ákelgen analardy kórýge asyqtyq. Jap-jas, áp-ádemi súıkimdi eki qazaqtyń qyzynyń kóp balalardyń anasy atanǵanyna qýanyp, ári tańǵalystyq.
– Búgin qalamyzda erekshe tarıhı kún, úlken oqıǵa. О́ıtkeni, ylǵı tórtem týyla bermeıdi. Budan 5 jyl buryn Almatydaǵy respýblıkalyq ana men bala densaýlyǵyn qorǵaý ortalyǵynda osyndaı oqıǵa bolǵan. Biraq, ol jasandy uryqtandyrý (EKO) jolymen edi. Bul jolǵy tórtem fızıologııalyq jaǵdaımen bolyp otyr. Biz birden habarlap, súıinshi suraýǵa asyqpadyq. Qazir náresteler ıntensıvti palatadan shyqty. Qazaqtyń basyna bas qosyp, sanyn ulǵaıtyp, demografııamyzǵa úles qosyp jatqan eki qyzymyzǵa rızamyz. Balalardyń deni saý bolsyn. Amandyq bolsa tórtemniń anasy «Altyn alqa» belgisin alady, – dedi Almaty qalasy ákimdiginiń atynan kishkentaılarǵa syılyq tapsyrǵan Záýresh Jumanáliqyzy.
Onyń aıtýynsha, byltyr Almaty qalasynda 7 úshem dúnıege kelse, bıylǵy jarty jyldyń ishinde 4 úshem týǵan. Jalpy, Almaty boıynsha jylyna 42-43 myń bala dúnıege keledi. Al árbir 9-shy qazaqstandyq Almatyda týylyp, ár 8-shi qazaqstandyq qalamyzda emdeledi eken. Jas analarǵa 2 medbıkeden bólinedi.Al páter máselesi otbasylardyń materıaldyq jaǵdaıy tekserilip baryp qarastyrylmaq.
Adam urpaǵymen myń jasaıdy degen. Úsh ul ósirip otyrǵan Baıan men Qanattyń otbasy birden bir ul jáne úsh qyz balamen tolyǵyp, máre-sáre qýanyshty kúı keshýde. Birden tórt balanyń anasy atanǵan tórtemmen anasy 35 jastaǵy Baıan Abdýllına shaqalaqtardy jeti aı boıy kóterip jetkizý qıyn bolǵanyn, biraq tabıǵat ózi salǵan túıinin, ózi sheshkenin aıtyp, jýrnalısterge suhbat berdi.
– Júktilik kezeńim qıyn ótti. Tórt balany osynshama aı boıy kóterip júrý ońaı emes eken. Qudaıdyń qudyretimen, dárigerlerdiń kómegimen osy kúnge aman jettik. Tórtem ekenin on birinshi aptada bildik. Bizdiń áýletimizde egiz bar. Úlken aǵataıym men ápkemniń egiz balalary erjetip keledi. О́zimizdiń 11-de, 7-de jáne 5-te úsh ulymyz bar. Men eki joǵary oqý orynyn bitirgenmen. Qazir KIMEP-te magıstratýrada oqımyn ári jeke kompanııada jumys isteımin. Balaqaılardyń esimderin áli qoıǵan joqpyz. Jer úıde turamyz. Endi birden 4 bala ómirge kelgen soń, úıdi úlkeıtý kerek sııaqty. Joldasym Qanat Erseıitov joǵary bilimdi, qazir jeke kásipkerlikpen aınalysady», - dedi jas bosanǵan ana.
Sondaı-aq ol qala ákimi orynbasarynyń sábılerge eki medbıke bólinip, olardyń densaýlyǵy jiti qadaǵalanatynyn, densaýlyq saqtaý salasy tarapynan barlyq kómek, jaǵdaı jasalatynyn aıtqanyn, sondaı múmkindikti paıdalanyp ózin bosandyrǵan ortalyqtyń barlyq bilikti mamandary men qyzmetkerlerine, esepke alyp, jeti aı boıy baqylaýda ustaǵan aıaǵy aýyr kelinshekterge keńes beretin №16 emhananyń dárigerlerine analyq rızashylyǵym sheksiz deı kele, munyń bári Elbasynyń júrgizip otyrǵan durys saıasatynyń arqasy ekenin de atap ketti.
– Eń bastysy tórtemniń aman-esen týǵany úshin alańdadyq, - dedi Almaty perınataldyq ortalyǵynyń dırektory Elmıra Jaqasheva.- Bizge kelip túskennen keıin eki kún operasııaǵa daıyndadyq. Ota sátti ótti. Úlkeni ul 2,3, odan keıin egiz qyz 2,2, 1,871, eń kenjesi 1,3 kılo salmaqpen týyldy. Medısınalyq komandanyń bilikti jumysynyń arqasynda otadan keıin asqynýlar bolmady. Ana da, balalar da ózderin jaqsy sezinýde.
Al úıinde 2 jasar qyzy bar Jarkentten kelip bosanǵan úshemniń anasy Tolǵanaı men ákesi Baýyrjannyń otbasy endi taǵy úsh sábımen tolyǵyp, kóp balalylar qataryna qosyldy.
-Úıde úlken qyzym - Aısha bar. Odan keıin mine, Injý, Ińkár, Aqnur degen úsh qyzym qatar dúnıege keldi. Tórt qubylam túgel dep sanaımyn. Allaǵa myń shúkir», - deıdi úshemniń ákesi 28 jastaǵy Baýyrjan Satybaldıev.
Mamandardyń aıtýynsha, qazir sábılerdiń densaýlyǵy jaqsy, úshemder kún sanap salmaq qosýda. Keshe perzenthanadan shyǵarylýy josparlanǵan.
Gúlzeınep SÁDIRQYZY,
«Egemen Qazaqstan».
Sýretterdi túsirgen
Aıtjan MURZAN.