Memleket basshysy Qasym-Jomart Toqaev Ulttyq Quryltaıdyń V otyrysynda Qyzylorda qalasynda zamanaýı, kópfýnksıonaldy kitaphana salý týraly josparyn jarııalady. Prezıdenttiń aıtýynsha, bilim men kitap oqý mádenıeti – ult damýynyń negizgi tirekteriniń biri, dep jazady Egemen.kz.
«Ozyq oıly ult bolýdyń eń tóte joly – kitap oqý. Sondyqtan kitap oqý mádenıetin qoǵamda barynsha ornyqtyrýymyz kerek», dedi Prezıdent.
Ulttyq deńgeıdegi aýqymdy áleýmettik jobany altyn óndiretin «Altynalmas» kompanııasy júzege asyrǵaly otyr. Atalǵan jobaǵa salynatyn jalpy ınvestısııa kólemi 20 mlrd teńgeni quraıdy. Bul bastama Qazaqstan óńirlerindegi mádenıet pen bilim salasyndaǵy eń iri jobalardyń birine aınalmaq.
Zamanaýı kitaphana
Jańa kitaphana óńirdiń eń iri mádenı-bilim ortalyǵyna aınalady. Ereksheligi – keıbir negizgi aımaqtar táýlik boıy oqyrmanǵa qoljetimdi bolady. Munda 100 oryndyq zamanaýı amfıteatrly, Hi-Tech quraldarymen jabdyqtalǵan ashyq formattaǵy oqý zaly, 50 jumys orny bar elektrondyq zal, medıalaboratorııa jáne sıfrlyq kontentpen, jasandy ıntellekt pen zamanaýı baǵdarlamalarmen jumys isteýge arnalǵan podkast-stýdııalar qarastyrylǵan.
Ǵımarattyń jalpy aýdany shamamen 13 000 sharshy metrdi quraıdy. Kitaphana kóp deńgeıli fýnksıonaldyq aımaqtarǵa bólingen. Mysaly, jertóle qabatynda arhıvter men sırek kezdesetin qorlar, negizgi kitap qory, restavrasııa men tıpografııa bólimderi, ádebıetti qabyldaý jáne taratý aımaqtary ornalastyrylady. Al birinshi qabatta býkshop pen kofehana, balalar kitaphanasy men oıyn aımaǵy, kovorkıng, 200 oryndyq konferens-zal jáne fýdkort qarastyrylǵan.
Ekinshi qabatta ólketaný jáne merzimdi basylymdar zaldary, ámbebap oqý zaly, anyqtamalyq-bıblıografııalyq bólim jáne kórme galereıasy ornalasady. Úshinshi qabat shyǵarmashylyqqa jáne zamanaýı formattarǵa arnalmaq. Munda kelýshilerge art-stýdııalar men sheberhanalar, medıalaboratorııa, óner zaly men sırek kitaptar zaly, álem ádebıeti bólimi, elektrondyq kitaphana jáne ashyq oqý aımaqtary qyzmet kórsetedi.
Osylaısha, kitaphana mektep oqýshylary, stýdentter, zertteýshiler, shyǵarmashylyq toptar, bilim men ıdeıalarmen jumys isteıtin barlyq adamdar úshin negizgi ortalyqqa aınalady.
Kompanııanyń atqaratyn róli
Joba Memleket basshysynyń bastamasymen iske asyrylyp, kompanııanyń bilim, ǵylym men mádenıetti uzaq merzimdi damytýǵa atsalysatyn senimdi áleýmettik seriktes ekenin kórsetedi. «Altynalmas» AQ aıtýynsha, bul bastama – olardyń júıeli áleýmettik saıasaty men bıznes strategııasynyń bir bólshegi.
«Adamnyń turaqty damýyna ınvestısııa qajet. Kitaphana – oıdy, mádenıetti jáne bolashaq urpaqty qalyptastyratyn oryn. Biz úshin ulttyq resýrstardyń qoǵamǵa uzaq merzimdi paıda ákelip, barlyǵyna úles qosýy mańyzdy», deıdi kompanııa ókilderi.
Jobanyń jobalyq-smetalyq qujattaryn ázirleýge 12 aı qajet. Qurylys jumystary 2029 jyldyń sońyna deıin aıaqtalady. Zamanaýı kitaphananyń paıda bolýy Qyzylorda oblysynyń rýhanı jáne ıntellektýaldy damýyna úles qosyp, bıznestiń memleketpen tıimdi seriktestigin kórsetetin úlgi bolmaq.
«Altynalmas» – áleýmettik jaýapkershilikti kompanııa, óńir ómirine júıeli túrde aralasyp keledi. Mysaly, 2025 jyly kompanııa úsh jyldyq aýqymdy baǵdarlamany bastap, kentter men shaǵyn qalalardyń turmysyn jaqsartýǵa 28,1 mlrd teńgeden astam qarajat jumsady. Bul qarjy Aqmola, Qaraǵandy, Pavlodar jáne Jambyl oblystarynda bilim, sport, densaýlyq saqtaý, turǵyn úı-kommýnaldyq qyzmetter, abattandyrý jáne mádenıet salasyndaǵy negizgi áleýmettik jobalardy júzege asyrýǵa baǵyttaldy.