ATYRAÝ. 13 tamyz. Atyraý oblysynyń Jylyoı aýdandyq soty 6 adamnyń ólimine sebepshi bolǵan júrgizýshige qatysty sot úkimin jarııa etti. Bul týraly oblystyq sottyń baspasóz qyzmetine silteme jasaǵan egemen.kz tilshisi habarlady.
Sottalýshy bıylǵy jyldyń 19 mamyrynda «Kamaz-55111» markaly avtomashınasymen Dossor-Beıneý tas jolynda kele jatyp aldyndaǵy kólikti basyp ozbaqshy bolady. Alaıda, ol kóligimen qarsy baǵytqa shyǵyp, «Lada-Largýs» markaly avtokóligimen betpe-bet soqtyǵysady. Nátıjesinde jeńil avtokóliktiń ishindegi 6 adam apat saldarynan kóz jumyp, bir adam aýyr dene jaraqatymen Atyraý oblystyq aýrýhanasyna jetkizilgen edi.
«Sot sottalýshynyń jasaǵan áreketine ókinetindigin jaýaptylyǵyn jeńildetetin mán-jaılar retinde tanyp, 5 jylǵa kólik quralyn basqarý quqyǵynan jáne 7 jyl merzimge bas bostandyǵynan aıyrý jazasyn taǵaıyndady», – dep habarlady oblystyq sottyń baspasóz hatshysy Boranbaı Ǵalıev.
Sot úkimi zańdy kúshine engen joq.
Joldasbek Shópeǵul.
Derek, sýret: Atyraý oblystyq sotynyń baspasóz qyzmeti.