Abaı atyndaǵy oblystyq ámbebap kitaphanada oblys ákimi Berik Ýálı jergilikti aqyn-jazýshylarmen erkin formatta kezdesý ótkizdi. Oǵan qala-aýdandardan kelgen zııaly qaýym ókilderi, aıtyskerler, jazba aqyndar men qalamgerler qatysty. Jıynda óńir basshysy áýeli qalam ustaǵan qaýymnyń qoǵamdaǵy ornyna toqtaldy.
– Memleket basshysy Qasym-Jomart Toqaev «Abaı jáne XXI ǵasyrdaǵy Qazaqstan» atty baǵdarlamalyq maqalasynda: «Semeı óńiri – qazaq tarıhyndaǵy kıeli ólkeniń biri. Sondyqtan eldiń rýhanı damýynda erekshe orny bar Semeı qalasyn tarıhı ortalyq retinde belgilegen jón», dep aıryqsha atap ótken bolatyn. Ádebıet pen mádenıettiń qazyǵy qaǵylǵan, kıeli Abaı eliniń rýhanııat sardarlarynyń aldyńǵy sapynda qalam ustaǵan qaýymnyń turatyny aqıqat. Sondyqtan da men búgin ózderińizben arnaıy júzdesip otyrmyn, – dedi oblys ákimi.
Kezdesý barysynda óńirdiń mádenıet salasynda atqarylyp jatqan ister men naqty nátıjeler sóz boldy. Prezıdent ókimimen belgili aqyn Tólegen Janǵalıev mádenıet salasyndaǵy memlekettik stıpendııa ıegeri atandy. Aıtysker aqyn Ásem Erejeqyzy «Aıboz» ulttyq ádebı syılyǵyn ıelendi. О́tken jyly «Abaı joly» kitaphanasy» serııasy aıasynda 25 aqyn-jazýshynyń kitaby jaryq kórip, óńir rýhanııatyna júıeli qoldaý kórsetildi.
Aldaǵy ýaqytta oblysta «Tarbaǵataı» dástúrli óner teatryn ashý kózdelgen. О́ńir basshysy Abaı oblysynyń gımnin jazýǵa arnalǵan «Ulylar eli» respýblıkalyq án baıqaýy bastalatynyn jarııalady. Ol eki baǵyttan turady: «Kıeli Abaı eli» – oblysqa arnalǵan gımn jazý jáne «Trend auen» – zamanaýı mýzykalyq shyǵarmalar baıqaýy. Buǵan qosa basqosýda konstıtýsııalyq reforma týraly da aıtyldy.
Kezdesýde kitaphana dırektory Mereı Qart «Abaı joly» kitaphanasy» jobasyn tanystyrdy. Sóz alǵan basqa da aqyn-jazýshylar men zııaly qaýym ókilderi óńirdegi rýhanııat salasyn júıeli qoldaý, jas qalamgerlerge arnalǵan granttarmen, óńirlik ádebı baıqaýlardyń aýqymyn keńeıtý, aýyldardaǵy kitaphana qoryn jańartý, aıtys ónerin ınstıtýsıonaldyq turǵyda damytý týraly usynys-pikirler aıtyldy.
Abaı oblysy