Ata zań – elimizdegi saıası júıeni tereń ári júıeli jańǵyrtýǵa baǵyttalǵan reformalardyń zańdy jalǵasy. Prezıdent janyndaǵy Memlekettik basqarý akademııasy alańyndaǵy dóńgelek ústelde bas qosqan kópshilik osylaı deıdi. Memlekettik qyzmetshiler Konstıtýsııaǵa qazirgi qoǵamda kezdesetin túrli syn-qater eskerilip, eleýli ózgeris engizilgenin basa aıtty.
Jıynǵa Memlekettik qyzmet isteri agenttiginiń basshylyǵy, Májilis depýtattary, memleket jáne qoǵam qaıratkerleri, qoǵamdyq uıymdar men ǵylymı zertteý ınstıtýttarynyń sarapshylary, joǵary oqý oryndarynyń basshylary, sondaı-aq akademııanyń professorlyq-oqytýshylyq quramy men qyzmetkerleri qatysty. Olar ashyq dıalog alańynda oılaryn ortaǵa salyp, jańa normalardy túsindirip, ózara pikir almasty.
«Konstıtýsııalyq deńgeıde adam kapıtalyn, bilim men ǵylym, ınnovasııa men mádenıetti damytý basymdyǵy bekitilýi memlekettik saıasattyń ózeginde adam jáne onyń áleýeti turǵanyn aıqyn kórsetedi. Memlekettik apparattyń basty mindeti de osy qaǵıdattan týyndaıdy. Búginde agenttik Parlamentke «Memlekettik qyzmet týraly» zańnyń jańa jobasyn engizdi. Zań jobasynyń fılosofııasy «Memleket – adam úshin» qaǵıdatyna negizdelgen. Biz memlekettik qyzmettiń servıstik ári klıentke baǵdarlanǵan mádenıetin qalyptastyryp jatyrmyz. Negizgi maqsat – memlekettik qyzmetterdi jedel ári qoljetimdi etý, bıýrokratııalyq kedergilerdi barynsha azaıtý, sybaılas jemqorlyqtyń týyndaýyna negiz bolatyn alǵysharttardy joıý. Jańa Konstıtýsııa jobasyn qoldaı otyryp, biz ádil ári tıimdi Qazaqstannyń jańa arhıtektýrasyn qalyptastyrýǵa baǵyttalǵan ortaq qadam jasaımyz», dedi Memlekettik qyzmet isteri agenttiginiń tóraǵasy Darhan Jazyqbaı.
Jıynda Májilis depýtaty, Konstıtýsııalyq reforma jónindegi komıssııa múshesi Marat Báshimov jańa Ata zań jobasyndaǵy normalar formaldy ózgeris emes, mazmundyq turǵydan azamattyń múddesin qorǵaýǵa baǵyttalǵan júıeli qadam ekenin jetkizdi.
«Jańa Konstıtýsııadaǵy engizilgen normalardyń barlyǵy adam quqyǵy standarttaryna tolyq sáıkes keledi. Men usynǵan bastamalardyń biri – jeke jáne personaldyq quqyqty konstıtýsııalyq deńgeıde naqtylap, olardyń jaýapkershilik tetikterin kúsheıtý. Búginde jeke derekterdi qorǵaý, azamattyń jeke ómirine qol suqpaý sekildi máseleler erekshe mańyzǵa ıe. Sondyqtan mundaı quqyqtardy joǵary deńgeıde bekitý – ýaqyt talaby. Eńbek quqyqtaryna kelsek, qoldanystaǵy normada «eńbek bostandyǵy» uǵymy qoldanylǵan. Al jańa jobadaǵy «eńbek etý quqyǵy» degenimiz – azamattyń jumys isteý erkindigi ǵana emes, sonymen qatar jumysqa ornalasý múmkindigi, áleýmettik kepildikter, ádil jalaqy, qaýipsiz eńbek jaǵdaıy sekildi keshendi qorǵalýy degen sóz. Eger bul qaǵıda konstıtýsııalyq deńgeıde bekitilse, onda Eńbek kodeksi men ózge de áleýmettik zańnamalar soǵan sáıkes keltirilýge tıis. Nátıjesinde, eńbek qatynastaryna degen kózqaras ta, quqyqtyq mádenıet te ózgeredi», dedi ol.
Jańa Konstıtýsııanyń basty ereksheligi – onyń shyn máninde halyqtyń qatysýymen ázirlenýi. Prezıdent janyndaǵy Memlekettik basqarý akademııasynyń professory Zulfuhar Ǵaıypovtyń aıtýynsha, konstıtýsııalyq reforma jónindegi komıssııa jumysynyń ashyq formatta, tikeleı efır arqyly júrgizilýi, 10 myńnan asa usynystyń qaralýy – qujattyń jalpyulttyq sıpat alǵanyn kórsetedi. Sondaı-aq ol 7-bapta memleket pen dinniń araqatynasy aıqyn kórsetilgenin aıtty.
«Preambýlada myńjyldyq tarıhymyzǵa silteme jasalýy – tarıhı sabaqtastyqty saqtaý men ulttyq biregeılikti nyǵaıtýdyń aıqyn kórinisi. Bul – keleshek urpaqqa baǵyttalǵan ıdeologııalyq ári qundy baǵdar. Sondaı-aq zaıyrlylyq qaǵıdatynyń jazylyp, din men memleket bólek dep kórsetilýi quqyqtyq naqtylyqty qamtamasyz etedi. Jalpy alǵanda, jańa Konstıtýsııa – quqyqtyq qujat qana emes, elimizdiń bolashaq damý baǵytyn aıqyndaıtyn strategııalyq baǵdar», dedi Z.Ǵaıypov.