Saýda jáne ıntegrasııa mınıstrliginiń alqa otyrysynda byltyrǵy jumys qorytyndylanyp, bıylǵy basty mindetter aıqyndaldy. Jıyndy Premer-mınıstrdiń orynbasary – Ulttyq ekonomıka mınıstri Serik Jumanǵarın ashyp berdi.
О́tken jyly saýda salasy elimizdiń jalpy ekonomıkalyq ósiminiń 26%-yn qamtamasyz etip, ekonomıkanyń negizgi qozǵaýshy kúshteriniń biri ekenin taǵy bir márte dáleldedi. Ishki taýar aınalymy 80 trln teńgege jetti. Salaǵa 1,3 trln teńge kóleminde ınvestısııa tartyldy. Shıkizattyq emes eksport 41 mlrd dollardy qurady. Qyzmetter eksporty 3,7%-ǵa ósip, 12,3 mlrd dollarǵa jetti.
S.Jumanǵarınniń aıtýynsha, saýda óndiris, bıznes jáne tutynýshy arasyndaǵy ózara baılanysty qamtamasyz etip, ekonomıkanyń turaqty damýyna berik negiz qalaıdy.
«Bizdiń mindetimiz – qol jetkizilgen qarqyndy saqtap qana qoımaı, saýda júıesin tıimdilik pen básekege qabilettiliktiń jańa sapaly deńgeıine kóterý. Mınıstrlik retteýshi organ rólinen belsendi damý draıverine aınalýǵa tıis. Bul úshin kóterme jáne bólshek saýda aınalymyn ulǵaıtý, ishki naryqty otandyq taýarlarmen tolyqtyrý, áleýmettik mańyzy bar ónimderdiń turaqty jetkizilýin qamtamasyz etý, «óndirýshiden – sórege deıingi» tizbekti qysqartý, eksport kólemin arttyrý men saýdany kóleńkeli aınalymnan júıeli túrde shyǵarý qajet», dedi vıse-premer.
Buǵan qosa eldiń uzaqmerzimdi damýyna yqpal etetin qurylymdyq ózgerister men aýqymdy reformalardy túsindirý jumystarynyń mańyzdylyǵy da atap ótildi. Alqa otyrysyna qatysýshylar jańa Konstıtýsııany qabyldaý jónindegi referendýmǵa belsendi qatysýǵa shaqyryldy.
Memleket basshysynyń ınflıasııa deńgeıin ekonomıkalyq turǵydan negizdelgen shekke deıin tómendetý jónindegi tapsyrmalaryn oryndaý maqsatynda Saýda jáne ıntegrasııa mınıstrligi men Aýyl sharýashylyǵy mınıstrligine qysqa merzim ishinde ishki naryqty otandyq azyq-túlik taýarlarymen tolyq qamtý boıynsha naqty sharalar ázirleý mindeti júkteldi.
«Bıyl ekonomıkanyń naqty sektoryndaǵy jobalardy qarjylandyrý maqsatynda «Báıterek» holdıngin 1 trln teńgege kapıtaldandyrý kózdelip otyr. Investısııalyq tapsyrys aıasynda qazir edáýir kólemde ımporttalatyn taýarlar óndirisin keńeıtýge baǵyttalǵan shamamen 1,5 myń jobadan turatyn aldyn ala tizim qalyptastyryldy. Onyń ishinde 500-den astamy agroónerkásiptik keshenge, 400-den astamy óńdeý ónerkásibine, qalǵany ınfraqurylym salasyna tıesili. Saýda jáne ıntegrasııa mınıstrliginiń negizgi mindeti – osy jobalar sheńberinde óndiriletin ónimniń kepildi satylymyn qamtamasyz etý. Bul – aýqymdy jumys, sondyqtan ony júzege asyrý tetikterin qazirden bastap naqtylaý qajet», dedi S.Jumanǵarın.
Sondaı-aq otandyq óndirýshilerdi qoldaý, bırjalyq saýdany damytý, salalyq úderisterdi sıfrlandyrý men joǵary qosylǵan quny bar ónim eksportyn arttyrý baǵytyndaǵy mindetter de aıqyndaldy.