Premer-mınıstrdiń orynbasary Qanat Bozymbaev jumys sapary barysynda Qaraǵandy oblysy óńiriniń sý tasqyny kezeńine daıyndyǵyn tekserdi. Sondaı-aq sý basý qaýpi bar Buqar jyraý, Qarqaraly, Shet, Abaı aýdandaryndaǵy negizgi gıdrotehnıkalyq qurylystar men eldi mekenderdiń jaǵdaıyn baǵalady.
Vıse-premer Nura ózeniniń arnasy boıyndaǵy Kókpekti, Baıqadam, Petrovka, Sarytóbe, Botaqara, Sheshenqara aýyldaryn, sondaı-aq «Baıqadam», «Mınkovskaıa» sý bógetterin, Ashysý sý qoımasyn aralady. Sherýbaı-Nura ózeni boıyndaǵy Qarashoqy, Besoba, Aqsý-Aıýly, Qaıraqty, Nurataldy, Aqsý, Shopa eldi mekenderi tekserildi. Sonymen qatar Krasnaıa Polıana aýylyndaǵy qorǵanys bógettiriniń jaı-kúıi qaraldy.
Abaı aýdanynda Iýjnyı, Qulaaıǵyr jáne Taszaemka aýyldary, sondaı-aq «Sherýbaı-Nura» men «Jartas» sý qoımalarynyń jaǵdaıy zerdelendi. Budan bólek, Qanat Bozymbaev Samarqand sý qoımasy gıdrotorabynyń jumysymen tanysyp, Chkalov aýylyndaǵy qorǵanys bógetterin tekserdi.
Qaraǵandy oblysy ákimdiginiń málimetinshe, óńirde negizgi sý tasqynyna qarsy is-sharalar aıaqtalǵan. Qazir jumystar Temirtaý qalasynda jalǵasyp jatyr. 25 shaqyrym qorǵanys dambalary men bógetter salynyp, nyǵaıtyldy, ózen arnalarynyń 28 shaqyrymnan astam sý tasqyny qaýpi bar ýchaskelerine sanasııa júrgizildi, 21 shaqyrym drenaj ben sý burý júıeleri tazartyldy. 54 avtojol ýchaskesinde sý ótkizý qabileti arttyryldy, tórt gıdrotehnıkalyq nysanǵa jóndeý júrgizildi.
Jergilikti atqarýshy organdar materıaldyq-tehnıkalyq jáne qarjylyq rezervterdi qalyptastyrdy. Shamamen 1 mln 200 myń tekshe metr qar shyǵaryldy. Oblystyń 7 aýdany men 4 qalasynda sý basý qaýpi bar 139 eldi meken, sondaı-aq avtomobıl men temirjoldardyń 130 qaýipti ýchaskesi erekshe baqylaýǵa alynǵan. 217 sý sharýashylyǵy nysany turaqty monıtorıngte tur. Qazir óńirdegi sý tasqyny jaǵdaıy turaqty. Negizgi sý qoımalary shtattyq rejimde jumys istep tur. Samarqand pen Yntymaq sý qoımalarynan sanıtarlyq sý jiberý júrgizilip jatyr. Kóktemgi sý tasqyny jaǵdaıynyń qolaısyz damýy kezinde qutqarý men ózge de jumystardy uıymdastyrýǵa daıyndyq maqsatynda «Kóktem-2026» respýblıkalyq komandalyq-shtabtyq oqý-jattyǵýy bastaldy. Tótenshe jaǵdaılar mınıstrligi aýmaqtyq deńgeıdegi habarlandyrý júıesiniń daıyndyǵyn tekserdi.
1 naýryzdan bastap tótenshe jaǵdaılardyń aldyn alý maqsatynda azamattyq qorǵaýdyń aýmaqtyq kishi júıesiniń barlyq kúshteri men quraldary joǵary daıyndyq rejimine kóshiriledi. Jaýap berý sharalaryna 3 579 adam jáne 1 047 tehnıka birligi jumyldyrylǵan.