Almaty oblysynyń Jambyl aýdanyndaǵy aqynnyń mýzeı-úıinde ózi tutynǵan jeke zattary saqtalǵan. Jádigerler arasynda jyr alybynyń jeke avtokóligi de bar.
1936 jyly Məskeýde ótken qazaq kórkemóneriniń onkúndigine qatysyp, Kalınınniń qolynan orden alyp kelgennen keıin Qazaqstan úkimeti Jambylǵa aıryqsha kóńil bóle bastady. Aqynǵa arnap aýylynan úlken úı salyp berdi. Jańa úıine kóshken soń, 1938 jyly jyrshyǵa GAZ-M1 avtomobılin syıǵa tartty. Sonymen qatar kólik júrgizýshisi de bekitti.
Keńes zamanynda M1, ıaǵnı «emka» ataqty avtokóliktiń biri sanaldy. Bul kólikke kez kelgen adamnyń qoly jetpeıtin. Avtokólik Gorkov avtozaýytynda daıynaldy. Álbette, ol kezde M1 kóliginiń túsi negizinen qara boldy. Alaıda keıbir sala adamdaryna ártúrli tústegi «emka» berildi. Máselen, dárigerler mingen kóliktiń túsi aq bolsa, áskerıler jasyl tústisine mindi. Al mádenıet qaıratkerleri negizinen kók tústi kólikti tizgindedi. Sol sebepti Jambyl da kók tústi «emkaǵa» mindi. Osylaısha avtokóliktiń túsi arqyly ishinde qandaı salanyń adamy otyrǵanyn ońaı bilýge bolatyn.
Jambyl óz avtokóligin sırek qoldandy. Atqa minip úırengen aqyn kólikke mingendi asa unata qoımady. Degenmen jıyn-toılarǵa barǵanda osy kóligimen qatynaǵany jaıly derekter bar. Qazirgi ýaqytta bul kólik aqynnyń burynǵy úıi – qazirgi Jambyldyń mýzeı-úıine qarasty garajda saqtaýly tur.