Astanadaǵy Ulttyq akademııalyq kitaphanada Analar merekesi qarsańynda aıtýly kezdesý ótti. Qazaq qalamgerine jar bola júrip, bar murasyn tirnektep jınap, jaryqqa shyǵarǵany óz aldyna, áýlet irgesin saqtaǵan ananyń joly qashanda aıtýǵa turarlyq emes pe? Kósemsóz ustasy, aıtýly aýdarmashy Maral Hasen aǵamyzdyń jary Rymbala Smaıylova – sondaı sırek jandardyń biri.
Ulttyq akademııalyq kitaphanada Maral Hasen qory bar. Qalamgerdiń sońynda qalǵan kitaptarynyń tańdaýlylaryn osynda ótkizip, resmı tirketip júrgen jary – Rymbala apaı. Bul kisi jary dúnıe salǵan soń, qasıetti isin jalǵastyryp, Nobel syılyǵynyń laýreaty Svetlana Aleksıevıchtiń «Sınkovye malchıkı» povesin qazaqsha sóıletti (2017). Sondaı-aq Garrı Greıdiń «Odanjdy v Amerıke» bestsellerin (2021), Nuraına Sátbaevanyń «Serebrıanaıa tamga Alkı» (2022) áńgimeler jınaǵyn, Ilmaz Danııalulynyń «Nachalo. Dastan ı Arman» tarıhı sagasyn (2023) aýdarsa, osy joly ataqty Vıktor Gıýgonyń «Parıjdegi Notr-Dam soboryn» qazaqshalapty.
«Amanat arqalaǵan ana» atty shyǵarmashylyq kezdesý keshte atalǵan aýdarma kitabynyń tusaýkeser rásimi ótip, oqyrmannyń qolyna tıdi. Kezdesýdi «Astana aqshamy» gazetiniń sholýshysy, jýrnalıst Amanǵalı Qaljanov júrgizdi. Aýdarmashynyń basqa da eńbekterin kiriktire sóılegen moderator áýeli Ulttyq akademııalyq kitaphana dırektory Kúmis Seıitova men jazýshy Aıgúl Kemelbaevaǵa sóz berdi. Kúmis hanym Rymbala apaıdy quttyqtap, Mádenıet jáne aqparat vıse-mınıstri Rýstam Alıdiń Alǵyshatyn tapsyrdy.
«Ot basy, oshaq qasyn ádebıet atty uly uǵymnyń ordasyna aınaldyrý ekiniń biriniń qolynan kele bermeıdi. Maral Hasendeı aýdarmashy ári óte bilimdar adamdar da burynnan kóp bolmaǵan, biraq Qudaıǵa shúkir, baryna qýanamyz. Sondyqtan halyqtyń sana-sezimin kóterýge, ádebıet pen rýhanııatqa qyzmet etken sizdiń eńbekti óz basym joǵary baǵalaımyn ári árdaıym tilektespin», dedi jazýshy Aıgúl Kemelbaeva.
Jýrnalıst Maǵjan Sadyhan da Maral Hasenniń kisilik kelbetine keńinen toqtalyp, Rymbala apaıdyń eńbegi qasterleýge turatyn muraǵa aınalyp ketkenin lepes etti. Aýdarmashy, dramatýrg Kenjebaı Ahmet, basqa da tulǵalar avtorǵa aqjarma tilekterin jetkizdi.