Prezıdenttiń tapsyrmalaryna sáıkes, azamattardy qoljetimdi turǵyn úımen qamtamasyz etý maqsatynda 2025 jyly 20 mln sharshy metrden astam turǵyn úı paıdalanýǵa berilgen. Bul týraly ónerkásip jáne qurylys mınıstri Ersaıyn Naǵaspaev Úkimet otyrysynda málimdedi, dep habarlaıdy Egemen.kz.
Mınıstrdiń aıtýynsha 2026 jyly 18,5 mln sharshy metr turǵyn úı paıdalanýǵa beriledi. Degenmen, eger turǵyn úı qurylysyn yntalandyrý sharalary kúsheıtilse, bul kórsetkish odan ári ósýi múmkin. Negizgi qurylys jumystary Astana, Almaty jáne Shymkent qalalarynda júrgiziledi.
Turǵyn úı kezegi qalaı jumys isteıdi?
Salany qoldaý barysynda qurylys alańdaryn qarjylandyrýdan bastap ıpotekalyq baǵdarlamalardy keńeıtýge deıingi keshendi sharalar júzege asyrylady. Atap aıtqanda, ótken jyly kezekte turǵan azamattar úshin 218 mlrd teńgege 14,5 myń páter satyp alynǵan, al «nesıelik turǵyn úı» baǵdarlamasy boıynsha 140 mlrd teńgege taǵy 14 myń páter salynǵan jáne satyp alynǵan.
Memlekettik baspanalar jeńildikpen beriletin 2% jáne 5%-dyq ıpotekalyq qaryzdar arqyly qarjylaı qoljetimdi bolyp, olardy 5 myńnan astam otbasy paıdalanǵan. «Naýryz» jáne «Naýryz-Jumysker» baǵdarlamalary arqyly qosymsha 233 mlrd teńge somasyna 8,6 myń zaem berilgen.
Turǵyn úı erejesi túbegeıli ózgerdi
«Byltyr azamattarǵa 8 myńǵa jýyq jalǵa beriletin turǵyn úı jáne 11 myńnan astam jeńildikti ıpotekalyq qaryz berildi. Budan basqa, zańǵa engizilgen túzetýler buryn «satyp alý quqyǵynsyz» berilgen jalǵa beriletin turǵyn úıdi jekeshelendirý quqyǵyn berdi, ótken jyly bul múmkindikti 15 myńnan astam azamat paıdalandy. Sondaı-aq, 11 myńnan astam adam jaldaý aqysynyń bir bóligine sýbsıdııalardy paıdalandy, bul maqsattarǵa 7,6 mlrd teńge bólindi», dep atap ótti Ersaıyn Naǵaspaev.
Mınıstrdiń sózinshe, bul jumystar bıyl da jalǵasyp, 11,5 myń páter salý úshin 155 mlrd teńgege jergilikti atqarýshy organdardyń baǵaly qaǵazdary satyp alynbaq, sonymen qatar 18 myńnan astam jańa jeńildikti ıpotekalyq qaryzdar beriledi.
Astanada úleskerlerdi aldaǵan turǵyn úı keshenderine qatysty qylmystyq is qozǵaldy