Atyraý garnızonyndaǵy áskerı bólimniń merzimdi áskerı qyzmetshisi atys jattyǵýlary kezinde oq jaraqatyn aldy. Bul týraly Qorǵanys mınıstrliginiń baspasóz qyzmeti habarlady, dep habarlaıdy Egemen.kz.
Qaıǵyly oqıǵa 12 naýryzda bolǵan.
«Aldyn ala málimetter boıynsha, oqıǵa qarýmen abaısyz jumys isteýdiń saldarynan bolýy múmkin. Áskerı qyzmetshi dereý medısınalyq mekemege jetkizilip, oǵan qajetti medısınalyq kómek kórsetildi. Alaıda dárigerlerdiń barlyq kúsh-jigerine qaramastan, onyń ómirin saqtap qalý múmkin bolmady», delingen habarlamada.
Ishki ister mınıstrliginiń áskerı-tergeý basqarmasy qylmystyq is qozǵady. Oqıǵanyń barlyq sebepteri men mán-jaıyn anyqtaý úshin sotqa deıingi tergeý júrgizilip jatyr.
Oqıǵa ornyna Qorǵanys mınıstriniń orynbasary bastaǵan arnaıy komıssııa jiberildi. Ol jan-jaqty tekserý júrgizedi. Tergeý barysy Qazaqstan Respýblıkasynyń Bas áskerı prokýratýrasynyń baqylaýynda.
Qarýly kúshter basshylyǵy qaza tapqan áskerı qyzmetshiniń týystary men jaqyndaryna kóńil aıtty. Qorǵanys mınıstrliginiń málimetinshe, onyń otbasyna qajetti kómek pen qoldaý kórsetiledi.
Aıta keteıik, Abaı oblysynda 5 naýryzda áskerı tehnıkany paıdalaný kezinde aýyr jaraqat alǵan áskerı qyzmetshi kóz jumdy.