Ortalyq referendým komıssııasynyń tóraǵasy Nurlan Ábdirov Qazaqstanǵa respýblıkalyq referendýmdy baıqaýǵa kelgen halyqaralyq baıqaý mıssııalarynyń basshylary jáne sheteldik saılaý organdarynyń ókilderimen birqatar kezdesý ótkizdi.
Atap aıtqanda, TMD baıqaýshylar mıssııasynyń atynan TMD Bas hatshysynyń birinshi orynbasary Igor Petrıshenko, Qaýipsizdik jáne yntymaqtastyq sharty uıymynyń Parlamenttik Assambleıasy atynan Qyrǵyz Respýblıkasy Jogorký Keneshiniń Sot-quqyqtyq, quqyq retteý, qylmyspen kúres jáne jemqorlyqqa qarsy is-qımyl komıtet tóraǵasynyń orynbasarymen kezdesti.
Sonymen qatar Nurlan Ábdirov TÚRKPA Quqyqtyq máseleler jáne halyqaralyq qatynastar jónindegi komıssııasynyń tóraǵasy, Túrkııa Uly Ulttyq Májilisiniń depýtaty, Mıssııa basshysy Osman Mestenmen kezdesti.
Sondaı-aq birqatar shet memlekettiń saılaý organdary basshylarymen ekijaqty kezdesýler ótti. Túrik Respýblıkasy Joǵary saılaý keńesiniń tóraǵasy Ahmet Iener, Albanııa Respýblıkasy Saılaý jónindegi Bas komıssary Ilırdjan Chelıbashı, Qyrǵyz Respýblıkasynyń Saılaý jáne referendým ótkizý jónindegi ortalyq komıssııasynyń tóraǵasy Tynchtyk Shaınazarovpen kezdesýler barysynda Nurlan Ábdirov sheteldik áriptesterin respýblıkalyq referendýmǵa daıyndyqtyń negizgi baǵyttarymen tanystyrdy. Ol referendým komıssııalarynyń qyzmetin uıymdastyrý, daýys berý ýchaskeleriniń daıyndyq deńgeıi, azamattardyń konstıtýsııalyq quqyqtaryn júzege asyrýǵa baǵyttalǵan sharalar jáne aqparattyq jumys týraly aıtty.
Referendýmdy baıqaýǵa 38 memleket pen 11 halyqaralyq uıymnan barlyǵy 359 baıqaýshy akkredıtteýden ótti, bul daýys berý úderisiniń ashyqtyǵy men jarııalylyǵyn arttyrýǵa múmkindik beredi.
Sondaı-aq taraptar halyqaralyq baıqaý uıymdastyrý máselelerin, mıssııalardyń jumys jaǵdaılary jáne referendým komıssııalarymen ózara is-qımyldy talqylady. Halyqaralyq mıssııalardyń basshylary óz kezeginde baıqaý is-sharalarynyń josparlary men formattary týraly aqparat usyndy.