Naýryz meıramy qarsańynda Buqar jyraý atyndaǵy ádebıet jáne óner mýzeıi ıgi is-sharalardyń legin bastap ketti. Sonyń biri – oqýshy qyz balalar arasynda ótken «Dástúr – ulttyń tamyry» atty baıqaý.
Qyz balalardyń boıyna ulttyq qundylyqtardy sińirýdi kózdeıtin baıqaýǵa oblys ortalyǵyndaǵy mektepterdiń oqýshylary erekshe qyzyǵýshylyqpen qatysty.
– Baıqaýdyń negizgi maqsaty – halqymyzdyń san ǵasyrlyq ulttyq óneri urshyq ıirýdi jańǵyrtý, oqýshylardy tól mádenıetimizge baýlý ári qolóner týyndylaryn kúndelikti ómirde qoldana bilýge úıretý. Bul is-shara jas býynnyń shyǵarmashylyq izdenisin arttyryp, qazaqtyń salt-dástúrine degen qurmetin nyǵaıtýǵa baǵyttalǵan, dep atap ótti mýzeı qyzmetkeri Nazymgúl Shapaǵat.
Uıymdastyrýshylardyń sózinshe, baıqaýǵa 6-9 synyptarda oqıtyn qyz balalardyń shaqyrylýy kezdeısoq emes. Sebebi bul kezeńde olardyń bo-ıynda sheberlikke, estetıkalyq talǵamǵa, ulttyq tárbıege degen qyzyǵýshylyq qalyptasady. Al dástúr – halyqtyń ótkeni men bolashaǵyn jalǵaıtyn altyn kópir. Baıqaý barysynda qatysýshylar tek óz ónerlerin kórsetip qana qoımaı, ulttyq qolónerdiń qyr-syryn meńgerip, ony zamanaýı mánermen ushtastyrýdy úırendi.
Alǵashqy kezeńde qatysýshylar júndi qolmen tútý sheberligin kórsetti. Al ekinshi bólimde jyldam ıirý qabiletin, urshyqpen jumys isteýdegi eptilikterin baıqatyp, urshyqtyń jasalý joldary men ıirý ádisterin, qazaq analarynyń kúndelikti turmysynda qandaı mańyzǵa ıe bolǵanyn áńgimeledi.
Baıqaý qorytyndysy boıynsha birinshi oryndy Y.Altynsarın atyndaǵy daryndy balalarǵa arnalǵan oblystyq qazaq gımnazııa-ınternatynyń oqýshysy Dılnaz Tátenova, ekinshi oryndy №48 orta mekteptiń oqýshysy Nursaıa Sársenbaı jeńip alsa, júldeli úshtikti «Jas daryn» mamandandyrylǵan mektebiniń shákirti Naǵıma Ýálıden túıindedi. Birinshi oryn ıegeri planshetke, júldegerler uıaly telefonǵa ıe boldy. Qatysýshylarǵa ulttyq áshekeıler syıǵa tartyldy.
Pavlodar oblysy