Qadaý-qadaý ǵasyrlarda qazaq rýhanııatyna peıili túsken baı-baǵlandar az bolmaǵan. Solardyń biregeıi – Esenqul baı Mamanov osydan 111 jyl buryn qazaq romanyna qazirgi teńgemen eseptegende 33 mıllıon júlde tikkeni aına-qatesiz bolmasa da, búginde qaıyra jańǵyryp otyr. Demek, osy kúngi qaltalylar da ult rýhanııaty jolynda aıanyp jatqan joq. Myńdap sanalmasa da, Esenqul baıdan úlgi alǵandar bar.
О́tken jyly ERG dırektorlar keńesiniń tóraǵasy Shýhrat Ibragımovtiń qoldaýymen «Qazirgi zamanǵy qazaq romany» báıgesi jarııalandy. Atalǵan aýqymdy bastama qazirgi qazaq prozasyn damytýǵa serpin berip, jazýshylar men oqyrman arasyndaǵy baılanysty nyǵaıtýdy kózdegeni anyq. Baıqaýǵa 3000-nan astam ótinim túsip, qoǵamda ádebıetke degen qyzyǵýshylyqtyń áli de joǵary ekenin dáleldedi. Irikteý kezeńinen ótken segiz avtordyń jeteýi 3 mıllıon teńgeden qalamaqy aldy. Al bas júlde ıegerine on bes mıllıon teńge berildi.
Jobanyń mańyzdy nátıjeleriniń biri – fınalıst shyǵarmalardyń kitap bolyp basylyp shyǵýy. Ár shyǵarma 1000 dana taralymmen jaryq kórip, saltanatty is-sharada oqyrmanǵa usynyldy. Onyń 750 danasy Almatydaǵy Ulttyq kitaphanaǵa tapsyrylyp, aldaǵy ýaqytta el kitaphanalary arqyly keńinen taratylady.
Jobaǵa Dýman Ramazan «Synaq», Qýanysh Jıenbaı «Aralqumdaǵy aqyrǵy aıaldama», Nurjan Qýantaıuly «Opasyz oıyn», Asqar Altaı «Kaskad», Murat Almasbek «Eki jaǵalaý», Qýat Borash «Táýbe», Aıym Aqyltaı «Qaryz» atty romandarymen qatysyp, báıgege túsipti.
Saralaýdan ótken soń, bas júlde 15 mıllıon teńge jazýshy Júsipbek Qorǵasbekke «Kelndegi kókjal» romanyna berildi. Sonymen birge atalǵan týyndynyń jelisi boıynsha kórkem fılm túsirý jospary da jarııalandy.
«Qazirgi zamanǵy qazaq romany» jobasy búgingi ádebı úderisti qoldaıtyn mańyzdy bastamalardyń biri retinde baǵalanyp otyr. ERG dırektorlar keńesiniń tóraǵasy Shýhrat Ibragımov osy jobaǵa qatysýshylarǵa joldaǵan quttyqtaýynda ulttyq ádebıettiń mańyzyn atap ótip, jazýshylarǵa úlken úmit artatynyn jetkizdi. Onyń pikirinshe, qazirgi jas urpaq úshin ulttyq qundylyqtyń orny erekshe. Bul qundylyq tereń tarıhpen sabaqtasyp qana qoımaı, ınnovasııalar men sıfrlyq tehnologııalar ústemdik etken ashyq álemde bolashaqty baǵdarlaýǵa tıis. Sondaı-aq jańa dáýirdiń jańa keıipkerlerin qalyptastyrý – ádebıettiń basty mindetteriniń biri. Osy turǵyda mundaı baıqaýlar jas qalamgerlerge múmkindik berip, ulttyq ıdeıany jańa qyrynan túsindirýge jol ashady.
Árıne, álemdegi ár jetistiktiń artynda rýhanııattyń ózegi turǵany shyndyq. Aspanǵa ushqan ushqysh ta, alyp shyńdardy baǵyndyrǵan alpınıst te, Nıý-Iorktiń qor bırjasynyń qojaıyny da tyń oıdy, jańa ıdeıany eń aldymen, kitaptan alady. Sondyqtan «Qazirgi zamanǵy qazaq romany» jobasyn shyǵarmashylyq qaýymǵa degen úlken yqylastan, taza peıilden týǵan joba dep túsinemiz. Endigi jerde osyndaı jańa jobalar kóbeıe tússe, ult damýynyń negizi bolǵan rýhanııatymyzǵa qosylǵan úles bolar edi.