Premer-mınıstrdiń orynbasary – Mádenıet jáne aqparat mınıstri Aıda Balaeva men Týrızm jáne sport mınıstri Erbol Myrzabosynov Almaty oblysyndaǵy týrıstik nysandardyń jazǵy maýsymǵa daıyndyǵyn tekserdi.
Jumys saparyna ortalyq memlekettik organdardyń, Úkimet apparatynyń ókilderi, sondaı-aq Almaty oblysynyń ákimi Marat Sultanǵazıev qatysty.
Tekserý barysynda Qonaev qalasyndaǵy kommýnaldyq jaǵajaılar men «ASP Arena» kópfýnksıonaldy kesheni qaraldy. Oblys ákimdigi men beıindi qyzmetter sanıtarlyq daıyndyq, qaýipsizdik sharalary, medısınalyq, qutqarý men quqyq qorǵaý qyzmetteriniń jumysy, sondaı-aq demalýshylarǵa qolaıly jaǵdaı jasaý jóninde baıandady.
Aıda Balaeva nysandardyń tolyq daıyndyǵyn dál qazirden bastap qamtamasyz etý qajettigine erekshe nazar aýdardy. Sonymen qatar halyqpen ýaqytyly túsindirý jumysyn júrgizýdiń, sýdaǵy qaýipsizdikti, azyq-túlik qaýipsizdigin qamtamasyz etýdiń, qoǵamdyq tártipti saqtaýdyń mańyzdylyǵyn atap ótti.
Sonymen birge barlyq jaǵajaılar men demalys aımaqtary ákimdikterdiń qaraýynda emes ekeni de arnaıy aıtyldy. Osyǵan baılanysty vıse-premer jekemenshik nysandardyń ıeleri de tazalyqqa, qoǵamdyq tártipke, ınfraqurylymnyń jaı-kúıine, sondaı-aq eń aldymen adamdardyń sýdaǵy qaýipsizdigine tolyq jaýapkershilikpen qaraýǵa tıis ekenin aıtty. Oblys ákimdigine demalys aımaqtary ıeleriniń atyna qaýipsizdikti qamtamasyz etý, sanıtarlyq talaptardy saqtaý men jazǵy maýsym kezeńinde jumysty tıisti deńgeıde uıymdastyrý jónindegi usynymdar qamtylǵan tıisti habarlamalar ázirleý tapsyryldy.
Budan bólek, Týrızm jáne sport mınıstrine týrıstik nysandar ıeleri men jeke kompanııalardyń qajetti ınfraqurylymdy qamtamasyz etýine, qaýipsizdik talaptaryn saqtaýyna, belgilengen normalardy oryndaýyna qatysty jaýapkershiligin retteıtin quqyqtyq tetikterdi pysyqtaý júkteldi. Jekemenshik demalys aımaqtary azamattar men memleket aldyndaǵy tıisti jaýapkershiliksiz tek kommersııalyq qyzmetpen shektelmeýge tıis ekeni basa aıtyldy.
Premer-mınıstrdiń orynbasary týrıstik aımaqtarda jumys isteıtin qoǵamdyq tamaqtaný oryndary men ózge de servıstik nysandar qyzmetiniń zańdylyǵyn baqylaý qajettigine de aıryqsha kóńil bóldi. Ýákiletti organdar eńbek zańnamasynyń saqtalýyn, qyzmetkerlermen, onyń ishinde jumysqa tartylatyn jastarmen, stýdenttermen jasalǵan eńbek sharttarynyń bolýyn, sondaı-aq eńbek qaýipsizdigi talaptarynyń oryndalýyn udaıy tekserýi qajet. Azamattardyń quqyqtary tolyq kólemde saqtalýǵa tıis. Bul demalýshylardyń da, jergilikti turǵyndar men qyzmetkerlerdiń de quqyqtaryna birdeı qatysty.
Sonymen qatar kólik logıstıkasy, avtoturaqtardyń jetkiliktiligi, jol qozǵalysyn uıymdastyrý, jappaı demalys oryndaryndaǵy kólik aǵynyn retteý máselesi de kóterildi. Qoǵamdyq tártip pen qaýipsizdik talaptaryn buzýǵa qatań áreket etý qajettigi de aıtyldy. Aıda Balaeva barlyq belgilengen talaptar múltiksiz saqtalýǵa tıis ekenin, al quqyq buzýshylarǵa qatysty sharalar ýaqtyly ári zańnamaǵa sáıkes qabyldanýy qajet ekenin atap ótti.
«Taza Qazaqstan» ıdeologııasy jaı uran bolyp qalmaı, týrıstik nysandardyń jaı-kúıinen kórinis tabýy kerek. Ol tazalyqtan, tártipten, keńistiktiń túsinikti uıymdastyrylýynan, ortaq demalys ornyna degen qurmetten baıqalýǵa tıis. Al «Zań men tártip» qaǵıdaty barlyq qyzmettiń naqty ári úılesimdi jumysynan, qaýipsizdik talaptary men qoǵamdyq tártip normalaryn buzǵandarǵa qatysty sharalardyń bultartpaı qoldanylýynan kórinýi qajet», dedi A.Balaeva.
Jumys saparynyń qorytyndysynda Premer-mınıstrdiń orynbasary aýmaqtardyń sanıtarlyq jaǵdaıyn kúsheıtýdi, ınfraqurylym men qaýipsizdik qyzmetteriniń daıyndyǵyn qamtamasyz etýdi, halyqpen profılaktıkalyq túsindirý jumystaryn jandandyrýdy, sondaı-aq kommýnaldyq jáne jekemenshik demalys nysandaryna júıeli baqylaý ornatýdy tapsyrdy. Sonymen birge zańdylyqtyń saqtalýyna, azamattardyń eńbek quqyqtaryn qorǵalýyna, menshik ıeleriniń qaýipsizdik, tártip pen kórsetiletin qyzmet sapasy úshin jaýapkershiligine erekshe mán berildi.
Almaty oblysy