ASTANA. 14 mamyr. Qazaqstan Respýblıkasy Qarýly Kúshteriniń áskerı qyzmetshileri Uly Otan soǵysyna qatysqan qazaqstandyq ardagerlerdi Uly Jeńis merekesimen quttyqtaýdy jalǵastyrýda. Bul týraly egemen.kz tilshisi habarlady.
QR QK Áýe qorǵanysy kúshteri Bas qolbasshylyǵynyń basqarmasy Tárbıe jáne ıedologııalyq jumystar bas basqarmasynyń ofıserleri soǵys ardageri, gvardııanyń jaýyngeri Anna Gýbarevany quttyqtady. Ol ushqysh Núrken Ábdirov jáne Hıýaz Dospanovamen birge soǵysqa qatysqan ardager.
Áskerıler ardagerdi surapyl soǵys jyldaryndaǵy aýyrtpashylyqtarǵa qaramastan Uly Jeńis úshin jasaǵan erligine alǵys bildirdi.
«Biz árdaıym ardagerlerimiz týraly estelikti saqtap, olardyń jasaǵan dańqty erligi týraly jas býynǵa aıtyp otyratyn bolamyz. Biz ata-babalarymyzdyń qanymen kelgen beıbitshilikti saqtap, aǵa býyn men maıdanǵa qatysqan ardagerlerdiń jaýyngerlik dástúrin odan ári arttyrýǵa tyrysamyz», - dep atap ótti Áýe Qorǵanys kúshteri Tárbıe jáne áleýmettik jumystar bas basqarmasynyń aǵa ofıseri podpolkovnık Ádil Qozybaǵarov.
Anna Ivanovna áskerı qyzmetshilerge soǵys jyldary týraly, onyń ishinde on segiz jasynda tyl eńbekkerleriniń jumysshylar jasaǵyna óz erkimen jazylǵanyn, ormandaǵy aǵashtardy qulatyp, okoptar qazǵanyn jáne tankterge qarsy tosqaýyldar turǵyzǵany jaıly áńgimelep berdi. Al 1942 jyly áskerı komıssarıatqa baryp maıdanǵa attandy.
Soǵys jyldary ol aerodromdy qamtamasyz etetin 799-shy batalon quramynda shaıqasty. Sherment, Gambýrg, Kenısberg, Malbýrg, Elbern, Dıýseldorf jáne Kýrlıandııa qalalarynda ornalasqan batalon Ý-2 jáne Il-2 shabýyldaýshy ushaqtaryn qamtamasyz etýmen aınalysty.
«Biz naǵyz qıyn kezeńde áskerı qyzmet atqardyq. Meniń jadymda jan túrshigerlik kórinister máńgilikke saqtalyp qaldy. Aerodromdy ınjenerlik qyzmet jasaǵynyń quramynda biz Sherment qalasynda ushaqtarǵa qyzmet kórsettik. Kenetten pármendi bombalaý bastalyp ketti. Sol kezde kóptegen jaýyngerler, joldastarymyz jasyrynyp úlgermesten nemis bombasynyń astynda qaldy», dep áńgimeleıdi ardager ana.
Anna Ivanovna qyzmet ótkergen batalon aty ańyzǵa aınalǵan ushqyshtar Leonıd Beda, Núrken Ábdirov, Hıýaz Dospanova, Alekseı Maresev, Aleksandr Pokryshkın, Ivan Kojedýba, Anatolıı Efımovterdi ushýlaryn qamtamasyz etip, avıatehnıkalarǵa qyzmet kórsetti.
«Sol kezeńderde ushqyshtardyń daıarlyǵy «ushý-qondyrý» sııaqty qysqa baǵdarlama boıynsha iske asyrylatyn. Áskerlerge ushqyshtar qajet bolǵandyqtan olar óz kezeginde áýede is júzinde jattyǵýlardy oryndap, odan ári shaıqasqa attanyp otyrǵan. Ár jaýynger óz múmkindiginen asyra barlyq kúshin sarp etip kópten kútken jeńisti barynsha jaqyndatýǵa tyrysty», dep eske alady Anna Ivanovna.
Dastan Kenjalın.
Derek, sýret: Qazaqstan Respýblıkasy Qorǵanys mınıstrligi.